ସୋନପୁର (ଏଟିଆର ବ୍ୟୁରୋ); ଡ୍ୟୁଟି ସାରି ଘରକୁ ଫେରୁଥିଲେ ଯୁବତୀ । ରାତିର ଅନ୍ଧାରରେ ଏକୁଟିଆ ପାଇ ଯୁବତୀଙ୍କୁ ଟେକି ନେଲେ । ଆଉ ତିନି ଜଣ ମିଶି କରିଲେ ଦୁଷ୍କର୍ମ । ସୁବର୍ଣ୍ଣପୁର ସହରରୁ ଆସିଛି ଏଭଳି ଲଜ୍ଜାଜନକ ଖବର । ପୋଲିସ ଏହି ଘଟଣାରେ ଦୁଇ ଜଣଙ୍କୁ ଗିରଫ କରିଥିବା ବେଳେ ଅନ୍ୟଜଣେ ଫେରାର ହୋଇଯାଇଛି । ତନାଘନା କରୁଛି ପୋଲିସ । ଗିରଫ ଅଭିଯୁକ୍ତ ଦ୍ୱୟ ହେଲେ ଝୁପୁଡି ପଡାର ସୁଶାନ୍ତ ବାଘ(୨୫) ଏବଂ ରାନୁ ନାଗ । ଫେରାର ଅଭିଯୁକ୍ତ ହେଲା ନବ ବାଗ ।
ମିଳିଥିବା ସୂଚନା ମୁତାବକ,ଯୁବତୀ ଜଣକ ସୁବର୍ଣ୍ଣପୁର ସହରରେ ଏକ ଲୁଗା ଦୋକାନରେ କାମ କରନ୍ତି । ସବୁଦିନ କାମ ସାରି ରାତିରେ ଘରକୁ ଫେରନ୍ତି । ତେବେ ଖରାପ ମନବୃତି ରଖି ଏହି ତିନିଜଣ ବହୁଦିନ ହେବ ଛେକି ବସୁଥିଲେ । କିନ୍ତୁ ସେମାନଙ୍କୁ ସୁବିଧା ମିଳିନଥିଲା । ତେବେ ଶନିବାର ରାତିରେ ଏକୁଟିଆ ଅନ୍ଧାରରେ ଦେଖିବା ପରେ ରାସ୍ତାରୁ ଟିକେ ଦୂର ନିଛାଟିଆ ସ୍ଥାନକୁ ଟେକି ନେଇଥିଲେ ।
ଯୁବତୀ ଜଣକ ସେମାନଙ୍କ ଗୋଡ ହାତ ଧରି ଯେତେ କାକୁତି ମିନତି ହେଲେ ସୁଦ୍ଧା ତାଙ୍କ କଥା କେହି ଶୁଣିନଥିଲେ । ଜଣକ ପରେ ଜଣେ କରିଥିଲେ ଦୁଷ୍କର୍ମ । ଯୁବତୀ ଘରକୁ ଆସି ସବୁ କଥା କହିବା ପରେ ପରିବାର ଲୋକ ଥାନାରେ ଏତଲା ଦେଇଥିଲେ । ଏହାପରେ ସଦର ଥାନା ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରିଛି । ଫେରାର ଅଭିଯୁକ୍ତକୁ ଖୋଜୁଛି ପୋଲିସ ।
