ଗଞ୍ଜାମ ( ଏଟିଆର ବ୍ୟୁରୋ): ଗଞ୍ଜାମ ଥାନା ପୋଲିସ ଦୁର୍ଦ୍ଦାନ୍ତ ଅପରାଧୀ ସୁଶାନ୍ତ ବେହେରା ଓରଫ୍ କୋକୋକୁ ଏନକାଉଣ୍ଟର କରିଛି । ଆଜି ଭୋରୁ ଭୋରୁ ଏହି ଏନକାଉଣ୍ଟର ହୋଇଥିବା ଜଣା ପଡିଛି । ସୂଚନା ଅନୁସାରେ ଆଜି ଜୟଶ୍ରୀ କେମିକାଲ ରାସ୍ତାରେ ସୁଶାନ୍ତ ରହିଥିବା ପୋଲିସକୁ ବିଶେଷ ସୂତ୍ରରୁ ଖବର ମିଳିଥିଲା । ତେବେ ପୋଲିସ ଘଟଣାସ୍ଥଳରେ ପହଞ୍ଚି ଥିଲା । ପୋଲିସକୁ ଦେଖି କୋକୋ ଅଚାନକ ପୋଲିସ ଉପରକୁ ଗୁଳି ଚଳାଇଥିଲା ।
ପୋଲିସ ମଧ୍ୟ ଗୁଳିର ଜବାବ ଗୁଳିରେ ଦେଇଥିଲା । କୋକୋର ଆଣ୍ଠୁରେ ପୁଲିସର ଗୁଳି ବାଜିଛି । ସୁଶାନ୍ତ ନିକଟରୁ ପୋଲିସ ଗୋଟିଏ ଗୁଳି, ପିସ୍ତଲ ଓ ଗୋଟିଏ ବାଇକ୍ ଜବତ କରିଛି। ଆହତ ଅବସ୍ଥାରେ ପ୍ରଥମେ ସୁଶାନ୍ତକୁ ଛତ୍ରପୁରସ୍ଥିତ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପରେ ତାକୁ ମହାରାଜା କୃଷ୍ଣଚନ୍ଦ୍ର ଗଜପତି ମେଡିକାଲ କଲେଜ ଓ ହସ୍ପିଟାଲ ସ୍ଥାନାନ୍ତର କରାଯାଇଛି ।
ଏନକାଉଣ୍ଟର ବେଳେ ଦୁଇ ଜଣ ପୋଲିସ କନଷ୍ଟେବଳ ଆହତ ହୋଇଥିବା ସୂଚନା ମିଳିଛି । ପୋଲିସର କହିବା ଅନୁସାରେ କୋକୋର ବହୁଚର୍ଚ୍ଚିତ ଗଞ୍ଜାମର ସୁଧୀର ପାଢ଼ୀ ହତ୍ୟାକାଣ୍ଡ ସହ ସଂପୃକ୍ତ ଅଛି । ପୂର୍ବରୁ ସୁଶାନ୍ତ ନାଁରେ ଜିଲ୍ଲାର ବିଭିନ୍ନ ଥାନାରେ ଅପରାଧିକ ମାମଲା ରହିଛି।
