ଖୋର୍ଦ୍ଧା (ଏଟିଆର ବ୍ୟୁରୋ); ପୋଖରୀରୁ ଉଦ୍ଧାର ହେଲା ଯୁବକଙ୍କ କ୍ଷତାକ୍ତ ମୃତ ଦେହ । ରାଜସୁନାଖଳା ନିକଟ ଜାମନ୍ଦା ପୋଖରୀରୁ ମିଳିଛି ମୃତ ଯୁବକଙ୍କ ଶବ । ମୃତକ ଜଣକ ହେଲେ ଉତ୍ତମ ସାହୁ । ତାଙ୍କ ଘର ଯାଜପୁର ଜିଲ୍ଳାରେ । ସେ ରାଜ ସୁନାଖଳା ଅଞ୍ଚଳରେ ଏକ ଗ୍ୟାରେଜରେ କାମ କରୁଥିଲେ ବୋଲି ଜଣା ପଡିଛି । ତେବେ ମରିବାର କାରଣ ଜଣା ପଡିନଥିବା ବେଳେ ପୋଲିସ ଘଟଣାର ତଦନ୍ତ ଜାରି କରିଛି ।
ମିଳିଥିବା ସୂଚନା ମୁତାବକ ରବିବାର ସକାଳୁ ପୋଖରୀରେ ଶବ ଭାସୁଥିବା ଦେଖିବା ପରେ ସ୍ଥାନୀୟ ଲୋକ ଭୟ କରି ଯାଇଥିଲେ । ପରେ ଲୋକମାନେ ପୋଲିସ ଏବଂ ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇବା ପରେ ପୋଲିସ ଏବଂ ଦମକଳ ବାହିନୀ ଘଟଣାସ୍ଥଳରେ ପହଁଞ୍ଚି ମୃତ ଦେହକୁ ଉଦ୍ଧାର କରିବା ସହ ଶବକୁ ବ୍ୟବଛେଦ ପାଇଁ ପଠାଇ ଦେଇଛି । ବ୍ୟବଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣା ପଡିବ ବୋଲି କହିଛି ପୋଲିସ । ତେବେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି କି କେହି ମାରି ପୋଖରୀ ପକେଇ ଦେଇଛି । କାରଣ ମୃତ ଦେହଟି କ୍ଷତାକ୍ତ ହୋଇଛି ।
