ସୁନ୍ଦରଗଡ (ଏଟିଆର ବ୍ୟୁରୋ); ପୁଣି ଆତଙ୍କ ଖେଳାଇଲେ ଗଜରାଜ । ହାତୀ ଦଳାଚକଟାରେ ଚାଲିଗଲା ଜଣେ ବୃଦ୍ଧା ମହିଳାଙ୍କ ଜୀବନ । ମୃତକ ଜଣକ ହେଲେ ଫେଜେ ପେରେ । ତାଙ୍କ ଘର ସୁନ୍ଦରଗଡ ଜିଲ୍ଲା ଜବଲାଡିହି ଗାଁରେ । ମିଳିଥିବା ସୂଚନା ମୁତାବକ ଗତକାଲି ବିଳମ୍ବିତ ରାତିରେ ଗୋଟିଏ ହାତୀ ଗାଁ ଭିତରକୁ ପଶି ଆସିଥିଲା । ଫେଜେ ଘରେ ଶୋଇ ଅବସ୍ଥାରେ ହାତୀ ତାଙ୍କ ଘର ଭାଙ୍ଗିବା ଥିଲା । ଘର ଭାଙ୍ଗୁଥିବା ଦେଖି ବାହାରକୁ ବାହାରକୁ ଦୈାଡିଯାଉଥିବା ବେଳେ ଫେଜେଙ୍କୁ ହାତୀ ଚକଟି ପକାଇଥିଲା ।
ଗାଁ ଲୋକଙ୍କ ହୋହାଲ୍ଲା ପରେ ନିକଟରେ ପେଟ୍ରୋଲିଂ କରୁଥିବା ବନବିଭାଗ କର୍ମଚାରୀମାନେ ଆସି ହାତୀକୁ ଘଉଡାବା ସହ ଫେଜେଙ୍କୁ ଉଦ୍ଧାର କରିଥିଲେ । ଫେଜେ ପେରେଙ୍କୁ ଉଦ୍ଧାର କରି ନିକଟରେ ଥିବା ମେଡିକାଲକୁ ନେଉଥିବା ବେଳେ ବାଟରେ ମୃତ୍ୟୁ ହୋଇଥିବା ଜଣାପଡିଛି ।
ସପ୍ତାହେ ତଳେ ଛତିଶଗଡ଼ରୁ ଏକ ହାତୀ ପଲ କିଞ୍ଜିରକେଲା ଆସି ବ୍ୟାପକ କ୍ଷୟକ୍ଷତି ଘଟାଇଥିଲେ। ଏହି ପଲରେ ୧୩ ହାତୀ ଥିଲେ। ଏହି ହାତୀ ପଲକୁ ବନ ବିଭାଗ ତଡ଼ି ଦେଇଥିବା ବେଳେ ସେଥିରୁ ଗୋଟିଏ ହାତୀ ରହିଯାଇଛି। ଆଉ ଏହି ହାତୀ ତିନି ଦିନ ହେବ ବନ୍ଧବାହାଲ ଓ ଜବଲାଡିହି ଅଞ୍ଚଳରେ ଘୁରି ବୁଲୁଛି।ଏଥିସହ ରାତି ହେଲେ ଗାଁ ମୁହାଁ ହେଉଛି।
