ବ୍ରହ୍ମଗିରି (ଏଟିଆର ବ୍ୟୁରୋ): ଅଚାନକ୍ ଗୋରୁ ଗୁହାଳରେ ଲାଗି ଗଲା ନିଆଁ । ଚାହୁଁ ଚାହୁଁ ଗୁହାଳ ସମେତ ୭ଟି ଗୋରୁ ଜିଅନ୍ତା ଜଳି ପୋଡି ପାଉଁଶ ହୋଇଗଲେ । ଏହାବ୍ୟତୀତ ଗୁହାଳରେ ଥିବା ଅନ୍ୟ ଗୋରୁଙ୍କ ଅବସ୍ଥା ଗୁରୁତର ହୋଇ ପଡିଛି । ଏଭଳି ଏକ ଅଭାବନୀୟ ଘଟଣା ପୁରୀ ଜିଲ୍ଲା ବ୍ରହ୍ମଗିରି ଥାନା ଅନ୍ତର୍ଗତ ହାଣ୍ଡିଆଳି ଗାଁରେ ଘଟିଛି ।
ଗତକାଲି ବିଳମ୍ବିତ ରାତିରେ ହାଣ୍ଡିଆଳି ଗାଁର ଅଖାରୀ ବେହେରାଙ୍କ ଗୁହାଳରେ ନିଆଁ ଲାଗି ଯାଇଥିଲା । ଶୀତୁଆ ରାତିରେ ଚାରିଆଡେ ଜନଶୂନ୍ୟ ହୋଇଯାଇଥିବାରୁ ଅଚାନକ୍ ଗୁହାଳରେ ନିଆଁ ଲାଗଯିବା ଘଟଣା କେହି ଜାଣି ପାରିନଥିଲେ । ଫଳରେ ନିଆଁ ବ୍ୟାପିଯାଇ ସବୁକିଛି ଜଳିପୋଡି ପାଉଁଶ ହୋଇଯାଇଥିଲା । ଏଯାବତ୍ ନିଆଁ ଲାଗିବାର କାରଣ ସ୍ପଷ୍ଟ ହୋଇନଥିଲେ ମଧ୍ୟ ଗୁହାଳରେ ମଶାଙ୍କ ପାଇଁ ଦିଆଯାଇଥିବା ଧୂଆଁରୁ ଏଭଳି ଅଗ୍ନିକାଣ୍ଡ ଘଟିଥାଇ ପାରେ ବୋଲି ଅନୁମାନ କରାଯାଉଛି ।
