ସୋର (ଏଟିଆର ବ୍ୟୁରୋ): ରାତି ଅଧିରେ ଜଳିଗଲା ମାର୍କେଟ କମ୍ପ୍ଲେକ୍ସ । ଏଥିରେ ଚାରୋଟି ଦୋକାନ ଜଳି ପୋଡି ପାଉଁଶ ହୋଇଯାଇଛି । ଘଟଣାଟି ବାଲେଶ୍ୱର ଜିଲ୍ଲା ସୋର ରୋଷଛକର ସ୍ୱାଇଁ ମାର୍କେଟରେ ଘଟିଛି ।
ମାର୍କେଟ କମ୍ପ୍ଲେକ୍ସ ର ଦୋକାନୀ ମାନେ ଗତକାଲି ରାତିରେ କମ୍ପେ୍ଲକ୍ସ ବନ୍ଦ କରି ଯିଏ ଯାହା ଘରକୁ ଯାଇଥିଲେ । ମାତ୍ର ଅଚନାକ୍ ବିଳମ୍ବିତ ରାତିରେ ଏକ ସେଲୁନ୍ ରେ ନିଆଁ ଲାଗିଯାଇ ତାହା ଚାରି ଆଡକୁ ବ୍ୟାପି ଯାଇଥିଲା । ଏଥିରେ ଚାରୋଟି ଦୋକାନ ସମ୍ପୂର୍ଣ୍ଣ ଜଳି ଭସ୍ମ ହୋଇଯାଇଛି । ନିଆଁ ଜଳୁଥିବାର ଦେଖି ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଘଟଣାରେ ଦମକଳବାହିନୀ ଟିମ୍ ପହଁଚି ନିଆଁକୁ ଆୟତ୍ତ କରିଥିଲା ।
ଏଯାବତ୍ ନିଆଁ ଲାଗିବାର କାରଣ ସ୍ପଷ୍ଟ ହୋଇନଥିଲେ ମଧ୍ୟ ସର୍ଟସର୍କିଟ ଯୋଗୁଁ ହୋଇଥାଇ ପାରେ ବୋଲି ଅନୁମାନ କରାଯାଉଛି ।
