ଝାରସୁଗୁଡା (ଏଟିଆର ବ୍ୟୁରୋ): ୩ମାସ ଯାଏଁ ମିଳିବନି ଝାରସୁଗୁଡାରୁ ଭୁବନେଶ୍ୱର ବିମାନ ଚଳାଚଳ ସେବା । ଆସନ୍ତା ମାର୍ଚ୍ଚ ୨୯ରୁ ୩ମାସ ଯାଏଁ ବନ୍ଦ ରହିବ ଝାରସୁଗୁଡା ଭୁବନେଶ୍ୱର ବିମାନ ଚଳାଚଳ । ସୂଚନାନୁଯାୟୀ ଭୁବନେଶ୍ୱରର ରନ ୱେ ମରାମତି କାର୍ଯ୍ୟ ପାଇଁ ଏହି ବିମାନ ସେବାର ଉଡାଣକୁ ସ୍ଥଗିତ କରାଯାଇଛି । ଏହି ବିମାନ ସେବା ସ୍ଥଗିତ ହେବା ଫଳରେ ଏଲାଇନ୍ସ ଏୟାର ପକ୍ଷରୁ ଝାରସୁଗୁଡା- ଭୁବନେଶ୍ୱର- ବାରଣାସୀ- ଭୁବନେଶ୍ୱର- ଝାରସୁଗୁଡା ପାଇଁ ବିମାନ ସେବା ମିଳିପାରିବା ନାହିଁ ।
ଏହି ସେବା ମାର୍ଚ୍ଚ ୨୯ରୁ ଜୁନ ୩୦ ପର୍ଯ୍ୟନ୍ତ ବନ୍ଦ ରହିବ । ବିମାନ ସେବା ସ୍ଥଗିତ ହେବା ଫଳରେ ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳୁଛି । ଯାତ୍ରୀମାନେ ଝାରସୁଗୁଡାରୁ ବିମାନ ଯୋଗେ ଭୁବନେଶ୍ୱରରେ ଅତି ସୁବିଧାରେ ପହଞ୍ଚି ପାରୁଥିଲେ । ତେବେ ବିମାନ ସେବା ସ୍ଥଗିତ ହେବା ଫଳରେ ଭୁବନେଶ୍ୱରକୁ ଯାତାୟତ କରୁଥିବା ଯାତ୍ରୀ ନିରାଶ ହୋଇଛନ୍ତି ।
