ମାଲକାନଗିରି (ଏଟିଆର ବ୍ୟୁରୋ): ଦିନକୁ ଦିନ ଚୋରା ଚାଲାଣ ବଢି ଚାଲିଛି । ଚୋରଙ୍କର କାହାକୁ ଡର ଅଛି ନା ଭୟ । ବରଂ ଅଭିନବ ଉପାୟରେ ଚୋରା ଚାଲାଣ କରିଚାଲିଛନ୍ତି । ଏଭଳି ଏକ ଘଟଣା ଘଟିଛି ମାଲକାନଗିରି ମୁଦୁଲିପଡା ଅଞ୍ଚଳରେ । ପୋଲିସ ଏକ ଗଞ୍ଜେଇ ଚୋରା ଚାଲାଣ କରୁଥିବା ଆମ୍ବୁଲାନ୍ସକୁ ଜବତ କରିଛି ।
ମୁଦୁଲିପଡା ପୋଲିସକୁ ଏକ ବଡ ସଫଳତା ମିଳିଛି । ପେଟ୍ରୋଲିଂ କରୁଥିବା ସମୟରେ ପୋଲିସ ଆମ୍ବୁଲାନ୍ସକୁ ଚେକ୍ କରିଥିଲା । । ସେଠାରେ ଜାଣିବାକୁ ମିଳିଲା ଯେ ଆମ୍ବୁଲାନ୍ସରେ ରୋଗୀ ବଦଳରେ ଗଞ୍ଜେଇ ଚୋରାଚାଲାଣ ହେଉଛି । କିନ୍ତୁ ପୋଲିସ କବଳରୁ ବଞ୍ଚିବା ପାଇଁ ଡ୍ରାଇଭର ଜଣଙ୍କ ଗାଡିଟିକୁ ନେଇ ଦୃତ ଗତିରେ ଯାଉଥିବା ବେଳେ ଭାରସାମ୍ୟ ହରାଇ ରାସ୍ତା ତଳକୁ ଖସି ପଡିଥିଲା । ଫଳରେ ଡ୍ରାଇଭରଟି ଘଟଣାସ୍ଥଳରୁ ଚମ୍ପଟ ମାରିଥିବା ବେଳେ ପୋଲିସ ଆମ୍ବୁଲାନ୍ସରୁ ସାଢେ ତିନି ବସ୍ତା ଗଞ୍ଜେଇ ଜବତ କରିଛି । ହେଲେ କେଉଁଠୁ ଆସିଥିଲା ଏହି ଗଞ୍ଜେଇ ଏବଂ କେଉଁଠିକୁ ଚାଲାଣ ହେଉଥିଲା ଏନେଇ ପୋଲିସ ତଦନ୍ତ ଆରମ୍ଭ କରିଛି ।
