ଝାରସୁଗୁଡା (ଏଟିଆର ବ୍ୟୁରୋ); ସ୍ତ୍ରୀକୁ ପଥରରେ ଛେଚି ମାରିଦେଲା ନୃଂଶସ ସ୍ୱାମୀ । ମହିଳାଙ୍କ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ପୋଲିସ । ମୃତ ମହିଳା ହେଲେ ସୁନୀତା ଦଣ୍ଡସେନା । ସେପଟେ ଅଭିଯୁକ୍ତ ସ୍ୱାମୀ ଅଶୋକ ଦଣ୍ଡସେନାକୁ ଗିରଫ କରି ପଚରା ଉଚରା କରୁଛି ପୋଲିସ । ତେବେ ଏଭଳି ଲୋମହର୍ଷଣ ଘଟଣା ଘଟିଛି ସୁନ୍ଦରଗଡ ଜିଲ୍ଲା ଲଖନପୁର ବ୍ଳକ ଭତଲମା ଗାଁରେ ।
ପୋଲିସ ସୂଚନା ଅନୁଯାୟୀ ଅଶୋକ ଏବଂ ସୁନୀତା ଦୁହେଁ ଦିନ ମଜୁରିଆ ଭାବରେ କାମ କରନ୍ତି । ତେବେ ଗତକାଲି ମଧ୍ୟ ଦୁହେଁ କାମ କରିବା ପାଇଁ ଯାଇଥିଲେ । ମାତ୍ର ଫେରିବା ବାଟରେ କୌଣସି ଏକ କଥାକୁ ନେଇ ଦୁହିଁଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏଥିରେ ଅଶୋକର ମୁଣ୍ଡକୁ ପିତ ଚଢ଼ି ଯାଇଥିଲା । ଶେଷରେ ସୁନୀତାଙ୍କୁ ରାସ୍ତା ଉପରେ ପଥରରେ ଛେଚି ନୃଂଶସ ଭାବରେ ମାରି ଦେଇଥିବା ଅଭିଯୋଗ ହୋଇଛି । ଏହି ଖବର ପାଇବା ପରେ ପୋଲିସ ଘଟଣା ସ୍ଥଳରେ ପହଁଞ୍ଚି ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଥିଲା । ଏବଂ ଅଭିଯୁକ୍ତ ସ୍ୱାମୀକୁ ଗିରଫ କରିଛି ।
