ଭଦ୍ରକ (ଏଟିଆର ବ୍ୟୁରୋ): ହୁତୁହୁତୁ ହୋଇ ଜଳୁଛି ଘର । ତାହାପୁଣି ଗୋଟେ କି ଦୁଇ ବଖରା ନୁହେଁ । ନିଆଁ ଆରେ ସମ୍ପୂର୍ଣ୍ଣ ୨୫ ବଖରା ଘର । ସବୁକିଛି ଜଳି ପୋଡି ଛାର୍ ଖାର୍ ହୋଇଯାଇଛି । ଏଥିରୁ ବାଦ୍ ପଡି ନାହାଁନ୍ତି ୨ ଟି ଗାଈ । ଭୟାବହ ଅଗ୍ନିକାଣ୍ଡରେ ୨ଟି ଗାଈ ଜୀବନ୍ତ ଦଗ୍ଧ ହୋଇଛନ୍ତି । ଏହାସହିତ ଲକ୍ଷାଧିକ ଟଙ୍କାର ଧନ ସମ୍ପତି ସବୁ ଜଳି ପୋଡି ପାଉଁଶ । ଏଭଳି ଏକ ଅଭାବନୀୟ ଘଟଣା ଭଦ୍ରକ ଜିଲ୍ଲା ଭଣ୍ଡାରୀ ପୋଖରୀ ବ୍ଲକ୍ ରାଉତ ସାହିରେ ଘଟିଛି ।
ଗତକାଲି ବିଳମ୍ବିତ ରାତିରେ ଏହି ଅଘଟଣ ଘଟିଯାଇଛି । ଅଚାନକ୍ ଇଲେକ୍ଟ୍ରି ସର୍ଟସର୍କିଟ ହେବାରୁ ଗାଁରେ ଜଣଙ୍କ ଘରେ ନିଆଁ ଲାଗିଯାଇଥିଲା । ତାପରେ ନିଆଁ ଧୀରେ ଧୀରେ ଚାରିଆଡେ ବ୍ୟାପି ଯାଇଥିଲା । ସବୁଠୁ ବଡ କଥା ହେଲା ନିଆଁ ଲାଗିବାର ଜାଣି ଲୋକେ ସବୁ ଘରୁ ବାହାରକୁ ପଳାଇ ଆସି ଅଗ୍ନିଶମ ବିଭାଗକୁ ଖବର ଦେଇଥିଲେ । ଦମକଳ ବାହିନୀ ଆସିବା ପୂର୍ବରୁ ନିଆଁ ତୀବ୍ର ରୂପ ନେଇ ୧୭ଟି ପରିବାରର ୨୫ ବଖରା ଘର ଜାଳି ଦେଇଥିଲା । ଘଟଣାରେ ଦମକଳବାହିନୀ ପହଁଚି ନିଆକୁ ଆୟତ୍ତ କରିଥିଲେ ।
