ଭୁବନେଶ୍ୱର,(ଏଟିଆର ବ୍ୟୁରୋ): ନୂଆବର୍ଷ ଆଣିଦେଲା ପୂରା ଓଲିଉଡ ଲାଗି ଦୁଃଖ ଖବର । ଆଉ ନାହାନ୍ତି ଜଣାଶୁଣା ଟେଲି ଅଭିନେତ୍ରୀ ନିକିତା ବେହେରା । ଏକାଧିକ ଟିଭି ଚ୍ୟାନେଲରେ ପ୍ରସାରିତ ଧାରାବାହିକ କାର୍ଯ୍ୟକ୍ରମରେ ଅଭିନୟ କରି ଦର୍ଶକଙ୍କ ହୃଦୟ ଜିତିଥିବା ନିକିତାଙ୍କ ଆଜି ମଧ୍ୟାହ୍ଣରେ ମୃତ୍ୟୁ ହୋଇଛି ।
ମୁଣ୍ଡରେ ଆଘାତ ଲାଗିବା ଯୋଗୁ ସେ କଟକର ଏକ ଘରୋଇ ମେଡିକାଲରେ ଚିକିତ୍ସିତ ହେଉଥିଲେ । ତେବେ ସେଠାରେ ତାଙ୍କର ମୃତ୍ୟୁ ହୋଇଛି । ଯଦିଓ ମୁଣ୍ଡରେ ଆଘାତ କିପରି ଲାଗିଲା ତାହା ସ୍ପଷ୍ଟ ହୋଇନାହିଁ ତଥାପି ଘର ଛାତ ଉପରୁ ସେ ଖସି ପଡିବା ଯୋଗୁଁ ଏଭଳି ଦୁର୍ଘଟଣା ଘଟିଥିବା ଶୁଣିବାକୁ ମିଳୁଛି । ଏହି ଘଟଣାରେ ପରେ ପୂରା ଓଲିଉଡରେ ଏବେ ଶୋକର ଛାୟା ଖେଳିଯାଇଛି । ନିକିତାଙ୍କ ମୃତ୍ୟୁ ଖବର ପାଇ ବହୁ ଅଭିନେତା ଅଭିନେତ୍ରୀ ହସପିଟାଲରେ ପହଞ୍ଚି ନିକିତାଙ୍କ ଶେଷ ଦର୍ଶନ କରିଛନ୍ତି ।
ଖୁବ କମ ଦିନରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିବା ଅଭିନେତ୍ରୀ ନିକିତାଙ୍କ ଏଭଳି ମୃତ୍ୟୁକୁ ସହଜରେ କେହି ଗ୍ରହଣ କରିପାରୁନାହାନ୍ତି । ପୋଲିସ ମୃତ ଦେହକୁ ଜବତ କରି ପୋଷ୍ଟମର୍ଟମ ଲାଗି ପଠାଇଛି । ରିପୋର୍ଟ ଆସିବା ପରେ ମୃତ୍ୟୁ ପଛର କାରଣ କଣ ତାହା ଜଣାପଡିବ । ସୂଚନଯୋଗ୍ୟ, ନିକିତା ବିବାହ କରିଥିବା ବେଳେ ଏବେ ତାଙ୍କର ୬ମାସର ଏକ ପୁଅ ରହିଛି ।
