କେନ୍ଦ୍ରପଡା ( ଏଟିଆର ବ୍ୟୁରୋ): ପାଟକୁରା ନିର୍ବାଚନ ପାଇଁ ଏବେ ତିନି ଦଳର ପ୍ରମୁଖ ମାନେ ପାଟକୁରାରେ ଡେରା ପକାଇଛନ୍ତି । ମନ୍ତ୍ରୀଙ୍କ ଠାରୁ ଆରମ୍ଭ କରି ଚଳିତ ନିର୍ବାଚନରେ ପରାଜୟ ବରଣ କରିଥିବା ହେବିୱେଟ ନେତା ମଧ୍ୟ ନିଜ ଦଳର ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି । ଯେଉଁଥି ପାଇଁ ବିଧାନସଭା ଫାଙ୍କା ପଡୁଛି । ତେବେ ଏହି ଅବସରରେ ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲଙ୍କୁ ଜିତେଇବା ପାଇଁ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପାଟକୁରା ଗସ୍ତ କରିବାର କାର୍ଯ୍ୟକ୍ରମ ରହିଛି ।
ମୁଖ୍ୟମନ୍ତ୍ରୀ ପାଟକୁରା ନିର୍ବାଚନ ମଣ୍ଡଳିର ତିନିଟି ବ୍ଲକରେ ରୋଡ ଶୋ କରିବାର କାର୍ଯ୍ୟକ୍ରମ ରହିଛି । ଚଳିତ ନିର୍ବାଚନରେ ନବୀନ ଯେଉଁ ବସରେ ରୋଡ ଶୋ କରୁଥିଲେ ସେହି ବସରେ ନବୀନ ଏଠାରେ ମଧ୍ୟ ରୋଡ କରିବେ । ରୋଡ ଶୋ ସହିତ ସ୍ଥାନେ ସ୍ଥାନେ ନବୀନ ଭୋଟରଙ୍କୁ ସମ୍ଭୋଧିତ କରିବେ । ପାଟକୁରା ନିର୍ବାଚନମଣ୍ଡଳୀର ଡେରାବିଶ, ଗରଦପୁର ଓ ମାର୍ଶାଘାଇ ବ୍ଲକରେ ଏହି ରୋଡ ଶୋ କରାଯିବ ।
ସୂଚନା ଅନୁସାରେ ନବୀନ ହେଲିକପ୍ଟର ଯୋଗେ କେନ୍ଦ୍ରପଡା ଗସ୍ତ କରିବେ । ବାରିମୂଳ ଗ୍ରାମ ପଡିଆରେ ଅବତରଣ କରିବା ସେଠାରୁ ସେ ବସ ଯୋଗେ ବିଭିନ୍ନ ବ୍ଲକରେ କାର୍ଯ୍ୟକ୍ରମରେ ଯୋଗ ଦେବେ । ସୂଚନାଯୋଗ୍ୟ ପାଟକୁରାରେ ତିନି ରାଜନୈତିକ ଦଳ ସେମାନଙ୍କର ପ୍ରାର୍ଥୀ ଦେଇଥିଲେ ମଧ୍ୟ ଏଠାରେ ସିଧା ଲଢେଇ ବିଜେପି ପ୍ରାର୍ଥୀ ବିଜୟ ମହାପାତ୍ର ଓ ବିଜେଡି ପ୍ରାର୍ଥୀନି ସାବିତ୍ରୀ ଅଗ୍ରୱାଲଙ୍କ ମଧ୍ୟରେ ହେବ ବୋଲି ଅନୁମାନ କରାଯାଉଛି ।
