ଅନୁଗୋଳ (ଏଟିଆର ବ୍ୟୁରୋ) ; ରାସ୍ତା କଡରେ ଭାରସାମ୍ୟ ହରାଇ ଓଲଟି ପଡିଲା ପେଟ୍ରୋଲ ଟ୍ୟାଙ୍କର । ଲିକ ହୋଇ ରାସ୍ତାରେ ବୋହିଗଲା ଲିଟର ଲିଟର ପେଟ୍ରୋଲ । ଏହି ଖବର ପାଇବା ପରେ ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ ଜମିଯାଇଥିଲା । କାରଣ ହୁ ହୁ ହୋଇ ବଢ଼ୁଥିବା ପେଟ୍ରୋଲ ଯଦି ମାଗଣାରେ ମିଳୁଛି ତେବେ କିଏ କାହିଁକି ବା ଛାଡିବ । ଏଣୁ ଲୋକମାନେ ଠେଲା ପେଲା ହୋଇ ବୋହି ନେଇଥିଲେ ବାଲଟି ବାଲଟି ପେଟ୍ରୋଲ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କରଡା ପଡା ଅଞ୍ଚଳରେ ।
ମିଳିଥିବା ସୂଚନା ମୁତାବକ ଜେ ଏଚ ୧୦ ବିଡି ୯୭୮୮ ନମ୍ବର ଗାଡି ଏକ ପେଟ୍ରୋଲ ବୋଝେଇ ଟ୍ୟାଙ୍କର ଅନୁଗୋଳରୁ ସମ୍ବଲପୁର ଯାଉଥିବା ସମୟରେ ନିୟନ୍ତ୍ରଣ ହରାଇ ୫୫ ନମ୍ବର ଜାତୀୟ ରାଜପଥର କରଡା ପଞ୍ଚାୟତ ଅଫିସ ଆଗରେ ଓଲଟି ପଡିଥିଲା । ସେହି ସ୍ଥାନରେ ଥିବା ସ୍ଥାନୀୟ ଲୋକମାନେ ପେଟ୍ରୋଲ ନେଉଥିଲେ । ପରେ ଜରପଡା ଥାନା ପୋଲିସ ଖବର ପାଇବା ପରେ ଘଟଣା ସ୍ଥଳରେ ପହଁଞ୍ଚିବା ପରେ ଛାନଭିନ ଆରମ୍ଭ କରିଛି । ପୋଲିସ ପହଁଞ୍ଚିବା ପରେ ଲୋକମାନେ ପେଟ୍ରୋଲ ନେବା ବନ୍ଦ କରିଥିଲେ ।
