ଖୋର୍ଦ୍ଧା(ଏଟିଆର ବ୍ୟୁରୋ): ଗତ ସାଧାରଣ ନିର୍ବାଚନରେ କଂଗ୍ରେସକୁ ପଛରେ ପକାଇ ବିଜେପି ସିଧାସଳଖ ଟକର ଦେଇଥିଲା ଶାସକ ବିଜେଡିକୁ । ଏହା ପରଠାରୁ ବିଜେପି କର୍ମୀମାନଙ୍କ ମଧ୍ୟରେ ଉତ୍ସାହର ଅଧିକ ବଢିବାରେ ଲାଗିଛି । ରାଜ୍ୟ ସରକାରଙ୍କ ମନମୁଖୀ କାର୍ଯ୍ୟ , ଭ୍ରଷ୍ଟାଚାର ଓ ଅନ୍ୟାୟଗୁଡିକୁ ଲୋକଙ୍କ ପାଖରେ ପହଞ୍ଚାଇବା ସହ ରାଜ୍ୟ ବିଜେପି ଏବେ ସମସ୍ତ ସ୍ଥାନରେ ସଭ୍ୟ ସଂଗ୍ରହ କରିବା ପାଇଁ ସଂକଳ୍ପ ପଦଯାତ୍ରା କରିବାରେ ଲାଗିଛି ।
ଏହି ଅବସରରେ ଆଜି ବିଜେପିର ଭୁବନେଶ୍ୱର ସାଂସଦ ଅପରାଜିତା ଷଢଙ୍ଗୀ ଖୋର୍ଦ୍ଧା ମୁନିସପାଲଟିରେ ସଂକଳ୍ପ ପଦଯାତ୍ରା କରିଛନ୍ତି । ଜିଲ୍ଲା ବିଜେପି ସଭାପତି ସୁବାସ ଜେନାଙ୍କ ସମେତ ସମାଜସେବୀ କାଳୁ ଖଣ୍ଡେଇତରାୟ , କୃଷକନେତା ରଂଜନ ମଙ୍ଗରାଜ ଓ ରାଜ୍ୟ କାର୍ଯ୍ୟକାରିଣୀ ସଦସ୍ୟ ରଶ୍ମିରଂଜନ ମହାପାତ୍ର ପ୍ରମୁଖ ଉପସ୍ଥିତ ଥିଲେ । ପଦଯାତ୍ରା ଗୀତା ଭବନରୁ ବାହାରୀ ମଙ୍ଗଳା ମନ୍ଦିରଠାରେ ଶେଷ ହୋଇଥିଲା । ଜିଲ୍ଲା ସଭାପତିଙ୍କର ନେତୃତ୍ୱରେ ଶତାଧିକ ଲୋକ ଏହି ପଦଯାତ୍ରାରେ ଭାଗ ନେଇଥିଲେ । ପଦଯାତ୍ରା ଖୋର୍ଦ୍ଧା ସହର ପରିକ୍ରମା କରିବା ବେଳେ ସାଂସଦ ଅପରାଜିତା ସ୍ଥାନୀୟ ଲୋକମାନଙ୍କ ପାଖରେ ପହଞ୍ଚିବା ସହ ତାଙ୍କର ସୁବିଧା ଅସୁବିଧା ପଚାରି ବୁଝିଥିଲେ ।
