ଭୁବନେଶ୍ୱର (ଏଟିଆର ବ୍ୟୁରୋ); ଆଜିଠାରୁ ପ୍ରଚାର ଅଭିଯାନ ଆରମ୍ଭ କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ବ୍ରହ୍ମପୁର ସଂସଦୀୟ କ୍ଷେତ୍ରରେ ଏପ୍ରିଲ ୧୧ ପ୍ରଥମ ପର୍ୟ୍ୟାୟରେ ଭୋଟ। ନିର୍ବାଚନକୁ ଆଉ ୯ଦିନ ବାକି ଥିବାବେଳେ ତିନି ପ୍ରମୁଖ ରାଜନୈତିକ ଦଳ ପକ୍ଷରୁ ପ୍ରଚାର ଜୋର ଧରିଛି। ବିଜେପି ପ୍ରାର୍ଥୀଙ୍କ ପାଇଁ ବ୍ରହ୍ମପୁରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ପାରଳାଖେମୁଣ୍ଡିରେ ରାଷ୍ଟ୍ରୀୟ ସଭାପତି ଅମିତ ଶାହ ପ୍ରଚାର କରି ସାରିଥିବା ବେଳେ ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବ୍ରହ୍ମପୁର ଯିବେ ।
୨୦୧୯ ନିର୍ବାଚନ ପାଇଁ ନବୀନଙ୍କ ସମେତ ୪୦ ଜଣ ଷ୍ଟାର ପ୍ରଚାରକ ଓହ୍ଲାଇବେ ପ୍ରଚାର ମଇଦାନକୁ। ଟିକଟ ବଣ୍ଟନ ସରିବା ପରେ କିଏ କେଉଁଠି ନବୀନଙ୍କ ସହ ପ୍ରଚାରରେ ରହିବେ, ସେ ନେଇ ନବୀନ ନିବାସ ଘନ ଘନ ବୈଠକ ବସୁଛି। ନବୀନ ପଟ୍ଟନାୟକଙ୍କ ପ୍ରଚାରର ପ୍ରଭାବ, ତାହା ବିଜେପୁର ଉପ-ନିର୍ବାଚନରେ ସମସ୍ତ ରାଜନୈତିକ ଦଳ ଅନୁଭବ କରିଛନ୍ତି । ହେଲେ ପରୀକ୍ଷାମୂଳକ ଭାବେ ଯେଉଁଠି ପଞ୍ଚାୟତ ନିର୍ବାଚନରେ ପ୍ରଚାରକୁ ଗଲେନି ନବୀନ, ସେଠାରେ ବିଜେଡିରେ ସ୍ଥିତି କଣ ହୋଇଥିଲା, ତାହା ମଧ୍ୟ କାହାକୁ ଅଛପା ନୁହେଁ।
