ଝାରସୁଗୁଡା (ଏଟିଆର ବ୍ୟୁରୋ); ଜୋରସୋର ଚାଲିଛି ପ୍ରଚାର ଅଭିଯାନ । ଭୋଟରଙ୍କ ମନମୋହିବା ପାଇଁ ନେତାମାନେ ନିଆରା ଉପାୟରେ କ୍ୟାମ୍ପେନିଂ କରୁଥିବା ଦେଖିବାକୁ ମିଳିଛି । ତେବେ ଝାରସୁଗୁଡା ଆସନରେ ବିଜେଡି ପ୍ରାର୍ଥୀ ନବ ଦାସଙ୍କ ପ୍ରଚାର ପାଇଁ ତାଙ୍କ ସ୍ତ୍ରୀ ବାହାରିପଡିଛନ୍ତି । ଭୋଟରଙ୍କ ମନମୋହିବା ପାଇଁ ଦୁଆର ଦୁଆର ବୁଲି ରାଜ୍ୟ ସରକାରଙ୍କ ଉନ୍ନତି ମୂଳକ ଯୋଜନା ବିଷୟରେ ବଖାଣୁଛନ୍ତି ମିନତୀ ଦାସ । ସ୍ୱାମୀଙ୍କ ବିଜୟ ପାଇଁ ପୁଅକୁ ମଧ୍ୟ ସାଙ୍ଗରେ ଧରି ପ୍ରଚାର ଆରମ୍ଭ କରିଛନ୍ତି ନବଙ୍କ ପତ୍ନୀ । ପୁଅ ବିଶାଳ ମଧ୍ୟ ପ୍ରଚାରରେ ସାମିଲ ହୋଇ ଜନତାଙ୍କୁ ବାପାଙ୍କ ପାଇଁ ଭୋଟ ଭିକ୍ଷା କରୁଛନ୍ତି ।
ଝାରସୁଗୁଡାରେ କଂଗ୍ରେସ ପ୍ରାର୍ଥୀ ହୋଇ ଦୁଇଥର ବିଜୟ ହୋଇଛନ୍ତି ନବ ଦାସ । ତେବେ ଚଳିତ ନିର୍ବାଚନ ପୂର୍ବରୁ ସେ କଂଗ୍ରେସକୁ ବାଏ ବାଏ କହି ବିଜେଡିରେ ଯୋଗ ଦେଇଥିଲେ । ଏବଂ ଦଳ ତାଙ୍କ ଉପରେ ଭରଷା କରି ଟିକେଟ ମଧ୍ୟ ଦେଇଛି । ଏଥରକ ନୂଆ ଦଳ ପକ୍ଷରୁ ପୁଣିଥରେ ବିଜୟ ହୋଇ ହ୍ୟାଟ୍ରିକ ମାରିବା ଲକ୍ଷ୍ୟରେ ନବ । ଏଣୁ ନିଜର କଳ ଏବଂ ବଳକୁ ଲଗାଇ ଦେଇଛନ୍ତି । ନବ ଦାସଙ୍କ ପତ୍ନୀ ମିନତୀ ଦାସଙ୍କ ସହ କିଛି ମହିଳା ଓ ବିଜେଡି ସମର୍ଥକମାନେ ମଧ୍ୟ ଦୁଆର ଦୁଆର ବୁଲି ଭୋଟ୍ ମାଗୁଥିବା ବେଳେ ଜନତାଙ୍କ ଆଶୀର୍ବାଦ ମିଳିଲେ ନବ ପୁଣି ବିଧାୟକ ହୋଇ ଲୋକଙ୍କ ସେବା କରିବେ ବୋଲି ତାଙ୍କ ପତ୍ନୀ କହିଛନ୍ତି ।
