ଭୁବନେଶ୍ୱର (ଏଟିଆର ବ୍ୟୁରୋ); କେନ୍ଦ୍ରାପଡା ଲୋକସଭା ଆସନରେ ବୈଜୟନ୍ତ ପଣ୍ଡାଙ୍କୁ ସୌମ୍ୟରଞ୍ଜନ ପଟ୍ଟନାୟକ ଟକ୍କର ଦେବେ ବୋଲି ଶୁଣିବାକୁ ମିଳୁଛି । ବିଜେପି ପକ୍ଷରୁ ବୈଜୟନ୍ତ ପଣ୍ଡା ପ୍ରାର୍ଥୀ ହୋଇଥିବା ବେଳେ ବିଜେଡି ସୌମ୍ୟରଞ୍ଜନ ପଟ୍ଟନାୟକଙ୍କ ଉପରେ ଭରଷା କରି ଟିକେଟ ଦେବ ବୋଲି ଚର୍ଚ୍ଚା ହେଉଛି । କେନ୍ଦ୍ରାପଡା ସଂସଦୀୟ କ୍ଷେତ୍ରରେ ବୈଜୟନ୍ତଙ୍କ ଭଲ ଲୋକପ୍ରିୟତା ଥିବା ବେଳେ ତାଙ୍କୁ ଟକ୍କର ଦେବା ଭଳି ନେତା ଖୋଜୁଛି ବିଜେଡି । ତେବେ ସୌମ୍ୟରଞ୍ଜନ ହିଁ ଏକମାତ୍ର ଯୋଗ୍ୟ ପ୍ରାର୍ଥୀ ହେବେ ବୋଲି ଚର୍ଚ୍ଚା ଆରମ୍ଭ ହୋଇଛି ।
ବିଜେଡିରୁ ତଡା ଖାଇବା ପରେ ବୈଜୟନ୍ତ ବିଜେପିରେ ଯୋଗ ଦେଇଥିଲେ । ଦଳରେ ସାମିଲ ହେବା ପରେ ଦୁଇଟି ବଡ ପୋଜିସନରେ ରହିଛନ୍ତି ବୈଜୟନ୍ତ । ଯାହାକି ସଂସଦୀୟ କ୍ଷେତ୍ରରେ ତାଙ୍କର ଆହୁରି ବଳ ବଢ଼ାଇଦେଇଛି ବୋଲି ଶୁଣିବାକୁ ମିଳିଛି । ତେବେ ଏତେ ବଡ ହେବିୱେଟ ନେତାଙ୍କୁ ସେହିଭଳି ଜଣେ ଯୋଗ୍ୟ ପ୍ରାର୍ଥୀ ଟକ୍କର ଦେବା ଆବଶ୍ୟକ ରହିଛି । ଅପରପକ୍ଷରେ ସୌମ୍ୟଙ୍କ ସହ ରାଜ୍ୟସଭା ସାଂସଦ ହୋଇଥିବା ଅଚ୍ୟୁତ ସାମନ୍ତଙ୍କୁ କନ୍ଧମାଳ ସାଂସଦ ଟିକେଟ ଦେବା ପରେ ସୌମ୍ୟ ମଧ୍ୟ ଟିକେଟ ପାଇବା ଆଶାରେ ରହିଛନ୍ତି ବୋଲି ସାଧାରଣରେ ଚର୍ଚ୍ଚା ହେଉଥିଲା । ଏଣୁ ସେ କେନ୍ଦ୍ରାପଡାରେ ପ୍ରାର୍ଥୀ ହେବେ ବୋଲି ଶୁଣିବାକୁ ମିଳୁଛି । ପୂର୍ବରୁ ଏଠାରେ ଅଭିନେତାକରୁ ରାଜନେତା ହୋଇଥିବା ଅନୁଭବ ମହାନ୍ତି ନିର୍ବାଚନ ଲଢ଼ିବେ ବୋଲି ମଧ୍ୟ କୁହାଯାଉଥିଲା । ତେବେ ଆଗାମି ଦିନରେ ଏଠାରେ ବୈଜୟନ୍ତଙ୍କ ପ୍ରତିଦ୍ୱନ୍ଦୀ କିଏ ହେବ ତାଉପରେ ସମସ୍ତଙ୍କ ନଜର ।
