କେନ୍ଦୁଝର ( ଏଟିଆର ବ୍ୟୁରୋ) : ବେପୁରୁଆ ଗାଡି ଚାଳନା ପାଇଁ ବଳି ପଡିଲେ ଗଜରାଜ । ହାତୀଙ୍କୁ ବାଡେଇଲା ଟ୍ରକ । ଟ୍ରକ ନେଲା ଦୁଇ ହାତୀ ଜୀବନ । ଏମିତି ଏକ ମର୍ମନ୍ତୁଦ ସଡକ ଦୂର୍ଘଟଣା ଦେଖିବାକୁ ମିଳିଛି କେନ୍ଦୁଝର ଘଟଗାଁ ୨୦ ନଂ ଜାତୀୟ ରାଜପଥରେ । ସୂଚନା ଅନୁସାରେ ଗତକାଲି ବିଳମ୍ଭିତ ରାତିରେ ହାତୀପଲ ରାସ୍ତା ପାର ହେଉଥିବା ବେଳେ ଦୁଇଟି ଟ୍ରକ ହାତୀ ପଲଙ୍କୁ ଧକ୍କା ଦେଇଥିଲା ।
ଗୋଟିଏ ଟ୍ରକ ଦ୍ରୁତ ଗତିରେ ଆସି ବାଡେଇ ହୋଇ ଫେରାର ହୋଇ ଯାଇଥିବା ବେଳେ ଅନ୍ୟ ଏକ ଟ୍ରକ ଭାରସ୍ୟାମ ହରାଇ ରାସ୍ତା କଡକୁ ଓଲଟି ପଡିଥିଲା । ଓଲଟି ପଡିଥିବା ଟ୍ରକ ଡ୍ରାଇଭର ଘଟଣା ସ୍ଥଳରୁ ଫେରାର ହୋଇ ଯାଇଥିବା ଜଣା ପଡିଛି । ତେବେ ମୃତ ହୋଇଥିବା ହାତୀଙ୍କ ମଧ୍ୟରେ ଗୋଟିଏ ୩ ମାସର ଛୋଟିଆ ହାତୀ ରହିଥିବା ଜଣା ପଡିଛି ।
ତେବେ ଖବର ପାଇ ଘଟଣା ସ୍ଥଳରେ ବନ ବିଭାଗ କର୍ମଚାରୀ ପହଞ୍ଚି ଗୁରୁତର ହାତୀକୁ ଉଦ୍ଧାର କରିଛି । ଓଲଟି ପଡିଥିବା ଟ୍ରକର ହେଲପରକୁ ପୋଲିସ ପଚରା ଉୂଚରା ଆରମ୍ଭ କରିଛି । ତେବେ ଗିରଫ ହୋଇଥିବା ହେଲପରର କହିବା କଥା ପ୍ରଥମେ ସେମାନେ ଗୋଟିଏ ହାତୀକୁ ଧକ୍କା ଦେଇ ରାସ୍ତା କଡକୁ ଓଲଟି ପଡିଥିଲେ । ପରେ ଆଉ ଏକ ଟ୍ରକ ଆସି ହାତୀଙ୍କୁ ଧକ୍କା ଦେଇ ଘଟଣା ସ୍ଥଳରୁ ଫେରାର ହୋଇ ଯାଇଥିଲା ।
