ଝାରସୁଗୁଡା( ଏଟିଆର ବ୍ୟୁରୋ): ଟ୍ରେନ ଷ୍ଟେସନ ଛାଡି ଦେବାରୁ ୨ ଜଣ ଯୁବତୀ ଅଧା ରାସ୍ତାରେ ଡେଇଁ ପଡିଲେ ତଳକୁ । ଏମିତି ଏକ ଅଭାବନୀୟ ଘଟଣା ଘଟିଛି ଝାରସୁଗୁଡା ବାଗଡିହି ଷ୍ଟେସନ ନିକଟରେ । ତେବେ ଏଥିରେ ଆହତ ହୋଇଥିବା ଯୁବତୀଙ୍କ ନାମ ହେଉଛି ଜ୍ୟୋସ୍ନା ନାୟକ ଏବଂ ଧନମତୀ । ସୂଚନା ଅନୁସାରେ ଯୁବତୀ ଦ୍ୱୟ ଆଜି ଦିନ ୧୧ ଟା ବେଳେ ପୁରୀରୁ ହରିଦ୍ୱାର ଯାଉଥିବା କଳିଙ୍ଗ ଏକ୍ସପ୍ରେସରୁ ସେମାନେ ଡେଇଁ ପଡିଥିଲେ ।
ସେମାନେ ବାମରା ଷ୍ଟେସନରେ ଚଢିଥିଲେ ଟ୍ରେନରେ । ସେମାନେ ବାଗଡିହି ଷ୍ଟେସନରେ ଓହ୍ଲାଇଥିବାର ଥିଲା । ମାତ୍ର ସେମାନଙ୍କ ଅଜାଣତରେ ଟ୍ରେନଟି ଷ୍ଟେସନ ଅତିକ୍ରମ କରିଯାଇଥିଲା । ଯାହାଫଳରେ ଯୁବତୀ ଦ୍ୱୟ ବିଚଳିତ ହୋଇ ଚଳନ୍ତା ଟ୍ରେନରୁ ଓହ୍ଲାଇବାକୁ ଚେଷ୍ଟା କରୁଥିଲେ । ଫଳରେ ତଳେ ପଡି ଆହତ ହୋଇଥିଲେ । ଜ୍ୟୋସ୍ନାଙ୍କ ଗୋଡ କଟି ଯାଇଥିବା ବେଳେ ଧନମତୀଙ୍କର ମୁଣ୍ଡରେ ଗଭୀର ଆଘାତ ଲାଗିଛି । ତେବେ ଟ୍ରେନ ଛାଡି ଦେବାରୁ ସେମାନେ ଡେଇଁ ପଡିଥିବା ଅନୁମାନ କରାଯାଉଛି । ରେଳବାଇ ପୋଲିସ ଏନେଇ ତଦନ୍ତ ଆରମ୍ଭ କରିଛି ।
