ମୁମ୍ବାଇ ( ଏଟିଆର ବ୍ୟୁରୋ): ଆଉ ନାହାନ୍ତି ବଲିଉଡର ଚର୍ଚ୍ଚିତ ସିନେମା ସୋଲେର କାଲିଆ ଭୂମିକାରେ ଅଭିନୟ କରିଥିବା ବରିଷ୍ଠ ଅଭିନେତା ବିଜୁ ଖୋଟେ । ମୁମ୍ବାଇ ସ୍ଥିତ ତାଙ୍କ ବାସଭବନରେ ଆଜି ୭୭ ବର୍ଷରେ ତାଙ୍କର ପରଲୋକ ହୋଇଛି । ଦୀର୍ଘଦିନ ହେଲା ସେ ଅସୁସ୍ଥ ଥିବାରୁ ମୁମ୍ବାଇର ଏକ ହସପିଟାଲରେ ଚିକିତ୍ସିତ ହେଉଥିଲେ । ସେଠାରୁ ଆସି ଘରେ ମଧ୍ୟ ଚକିତ୍ସିତ ଅବସ୍ଥାରେ ରହିଥିଲେ ।
ଶ୍ରୀ ଖୋଟେ ବଲିଉଡ ସମେତ ଅନ୍ୟଭାଷାରେ ମଧ୍ୟ କେତେକ ସିନେମାରେ କାର୍ଯ୍ୟ କରିଛନ୍ତି । ପାଖାପାଖି ୩୦୦ ରୁ ଉର୍ଦ୍ଧ ସିନେମାରେ ସେ ତାଙ୍କ ଅଭିନୟର ଛାପ ଛାଡି ଯାଇଛନ୍ତି । ଏହି ବରିଷ୍ଠ ଅଭିନେତାଙ୍କ ମୃତ୍ୟୁକୁ ନେଇ ପୁରା ବଲିଉଡରେ ଶୋକର ଛାୟା ଖେଳି ଯାଇଛି । ସୋଲେ ଚଳଚ୍ଚିତ୍ରରେ ଗବର ସିଂଙ୍କ ସହଯୋଗୀ କଳାକାର ଭୂମିକାରେ ସେ ଅଭିନୟ କରିଥିଲେ ।
ଗବର ସିଂଙ୍କ ସେହି ଚର୍ଚ୍ଚିତ ସଂଳାପ – କିତନେ ଆଦମି ଥେ ରେ କାଳିଆ । ସେଇ କାଳିଆ ଚରିତ୍ରରେ ସେ ଅଭିନୟ କରି ଚର୍ଚ୍ଚାକୁ ଆସିଥିଲେ । ସେବେଠାରୁ ସେ ଆଉ ପଛକୁ ଫେରି ନାହାନ୍ତି । ଆଜି ଦିନ ୧୧ ଟା ୩୦ ରେ ତାଙ୍କ ଶେଷକୃତ୍ୟ ସମ୍ପର୍ଣ୍ଣ ହେବ ।
