ଅନୁଗୁଳ(ଏଟିଆର ବ୍ୟୁରୋ): ଅନୁଗୁଳ ବନଖଣ୍ଡ ଛେଣ୍ଡିପଦା ବନାଞ୍ଚଳର ପୁରୁଣାଗଡ଼ରେ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ପ୍ରତିବାଦରେ ଛେଣ୍ଡିପଦା- ବାଗଡିଆ ରାସ୍ତାରୋକ କରିଛନ୍ତି । ଯାହା ଫଳରେ ରାସ୍ତାର ଦୁଇ କଡରେ ଶତାଧିକ ଗାଡି ଅଟକି ରହିଛି । ସୂଚନା ଅନୁସାରେ ଆଜି ସକାଳୁ ମୃତ ମହିଳା ଜଣଙ୍କ ବିଲକୁ କାମ କରିବାକୁ ଯାଇଥିବା ବେଳେ ବିଲରେ ହାତୀ ଆକ୍ରମଣର ଶୀକାର ହୋଇଥିଲେ ।
ହାତୀ ମହିଳା ଜଣଙ୍କୁ ଶୁଣ୍ଢରେ କଚାଡି ଦେଇଥିଲା । ଯାହା ଫଳରେ ଘଟଣା ସ୍ଥଳରେ ମହିଳା ଜଣଙ୍କର ମୃତ୍ୟୁ ହୋଇଥିଲା । ମୃତ ମହିଳା ପାଣପଶି ଗାଁର ନଳିତା ମାଝୀ ବୋଲି ଜଣା ପଡିଛି । ତେବେ ନଳିତାଙ୍କ ମୃତ୍ୟୁକୁ ନେଇ ପରିବାର ଓ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି ।
ସ୍ଥାନୀୟ ଲୋକେ ମୃତକଙ୍କ ପରିବାରକୁ କ୍ଷତି ପୂରଣ ଦାବିରେ ଛେଣ୍ଡିପଦା ଓ ବାଗଡିଆ ରାସ୍ତାରୋକ କରିଛନ୍ତି । ଲୋକମାନେ ଟାୟାର ଜାଳି ରାସ୍ତାରୋକ କରିଛନ୍ତି । ଘଟଣା ସ୍ଥଳରେ ବନବିଭାଗ ପହଞ୍ଚି ତଦନ୍ତ ଆରମ୍ଭ କରିବା ସହ ହାତୀର ଗତିବିଧି ଉପରେ ନଜର ରଖିଛି ।
