ଢେଙ୍କାନାଳ (ଏଟିଆର ବ୍ୟୁରୋ): ପ୍ରାତଃ ଭ୍ରମଣ ହେଲା କାଳ । ଭ୍ରମଣ ବେଳେ ହଠାତ୍ ମୁହାଁମୁହି ହୋଇଗଲା ହାତୀ ସହିତ । ଶେଷରେ ଏହାର ପରିଣାମ ହାତୀ ଆକ୍ରମଣରେ ହେଲା ମୃତ୍ୟୁ । ଘଟଣାଟି ପରଜଙ୍ଗ ଥାନା ଅନ୍ତର୍ଗତ ଲୋଧଣି ଗାଁରେ ।
ନିରୁପମା ବିଶ୍ୱାଳ ନାମକ ଜଣେ ମହିଳା ଆଜି ସକାଳେ ପ୍ରାତଃ ଭ୍ରମଣ ପାଇଁ ଯାଇଥିଲେ । ବୁଲୁ ବୁଲୁ ହଠାତ୍ ଏକ ଦନ୍ତା ହାତୀ ସହିତ ସାମ୍ନାସାମ୍ନି ହୋଇଥିଲେ । ହାତୀ ତାଙ୍କୁ ଆକ୍ରମଣ ପାଇଁ ଗୋଡାଇ ଥିଲା । କିନ୍ତୁ ନରୁପମା ହାତୀ ପାଖରୁ ନିଜକୁ ବଞ୍ଚାଇବାରେ ଅସଫଳ ହୋଇଥିଲେ । ହାତୀ ପ୍ରଥମେ ତାଙ୍କୁ ଶୁଣ୍ଢରେ ଉଠାଇ କଚାଡି ଦେଇଥିଲା । ସେ ତଳେ ପଡି ଯିବା ପରେ ତାଙ୍କୁ ହାତୀ ଦଳି ଦେଇଥିଲା । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି । ସକାଳେ କିଛି ଗାଁ ଲୋକେ ମୃତଦେହ ଦେଖି ପ୍ରଥମେ ମୃତକର ପରିବାର ଲୋକଙ୍କୁ ଓ ପୋଲିସକୁ ଜଣାଇଥିଲେ । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ପରେ ବନବିଭାଗ ସେଠାରେ ପହଁଞ୍ଚି ଲୋକଙ୍କୁ ବୁଝାସୁଝା କରିବାରୁ ଲୋକେ ଶାନ୍ତ ପଡିଛନ୍ତି । ପୋଲିସ ମୃତଦେହ ବ୍ୟବଚ୍ଛେଦ ପାଇଁ ଡାକ୍ତରଖାନା ପଠାଇଛନ୍ତି । ପୂର୍ବ ମାସରେ ମଧ୍ୟ ଏହି ପଞ୍ଚାୟତରୁ ହାତୀ ଆକ୍ରମଣରେ ଆଉ ଜଣଙ୍କର ମୃତ୍ୟୁ ହୋଇଥିଲା ।
