ଖୋର୍ଦ୍ଧା ( ଏଟିଆର ବ୍ୟୁରୋ): ଖୋର୍ଦ୍ଧା କାଇପଦ ଠାରେ ଯୁବକକୁ ଗଛରେ ବାନ୍ଧି ବାଡେଇବା ଘଟଣାରେ ଜଣଙ୍କୁ ଆଜି ପୋଲିସ ଗିରଫ କରିଛି । ଏନେଇ ସୂଚନା ଦେଇଛନ୍ତି ଏସପି ଅଜୟ ପ୍ରତାପ ସ୍ୱାଇଁ । ଯେଉଁମାନେ ଏହି ମାମାଲାରେ ସଂପୃକ୍ତ ଅଛନ୍ତି ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁୂ ଏସପି ସୂଚନା ଦେଇଛନ୍ତି । ଗିରଫ ହୋଇଥିବା ଯୁବକଙ୍କ ନାମ ରାଜେନ୍ଦ୍ର ଭୂଆଁ ବୋଲି ଜଣା ପଡିଛି । ଅନ୍ୟଜଣେ ଯୁବକ କନ୍ତିଆକୁ ପୋଲିସ ଏବେ ଖୋଜୁଛି ।
ସୂଚନାଯୋଗ୍ୟ ଗତ କିଛିଦିନ ତଳେ କୌଣସି ଏକ ଘଟଣାକୁ ନେଇ କାଇପଦ ଓ ବଙ୍ଗିରା ଗ୍ରାମର ଯୁବକଙ୍କ ମଧ୍ୟରେ ବିବାଦ ଲାଗି ରହିଥିଲା । ତେବେ ଗତ ୧୮ ତାରିଖରେ କାଇପଦର ୨ ଯୁବକ କୌଣସି ପ୍ରକାରେ ପୀଡିତ ଯୁବକକୁ ପାଇବା ପରେ ନିଜ ଗ୍ରାମରେ ଥିବା ଏକ ନଡିଆ ଗଛରେ ବାନ୍ଧି ଦେଇଥିଲେ । ପରେ ଯୁବକକୁ ନିର୍ଦ୍ଧୁମ ପିଟିବା ସହିତ ତାକୁ ପରିସ୍ରା ପିଆଇଥିଲେ ।
ଯୁବକଟି ଯେତେ କାକୁତି ମିନତୀ ହୋଇଥିଲେ ମଧ୍ୟ ଉପସ୍ଥିତ ଲୋକେ ଏହାକୁ ବିରୋଧ କରିନଥିଲେ କି ଯୁବକକୁ ଉଦ୍ଧାର କରିନଥିଲେ । ତେବେ ଏହି ଘଟଣାର ଭିଡିଓ ଏବେ ଶୋସାଲ ମିଡିଆରେ ଭାଇରାଲ ହେବା ପରେ ଘଟଣାକୁ ନେଇ ଚର୍ଚ୍ଚା ଜୋର ଧରିଛି । ସବୁ ମହଲରୁ ଏଭଳି କାଣ୍ଡକୁ ନିନ୍ଦା କରାଯିବା ସହିତ ଅଭିଯୁକ୍ତ ୨ ଯୁବକଙ୍କୁ ଦଣ୍ଡ ଦେବାକୁ ଦାବି ହୋଇଥିଲା ।
