ନୂଆଦିଲ୍ଲୀ (ଏଟିଆର ବ୍ୟୁରୋ): ଭାରତୀୟ ପ୍ରମିୟମ ଲିଗ୍ (ଆଇପିଏଲ) ର ୧୨ତମ ସିଜିନ୍ ରେ ମଙ୍ଗଳବାର କୋଲକାତା ନାଇଟ୍ ରାଇଡରସ୍ (କେକେଆର) କୁ ସାତ ୱିକେଟରେ ହରାଇ ଚେନ୍ନାଇ ସୁପର କିଙ୍ଗସ୍(ସିଏସକେ) ବିଜୟ ହାସଲ କରିଛି । ଏହି ମ୍ୟାଚ୍ ପରେ ସିଏସକେ ଟିମ୍ ବୁଧବାର ସକାଳୁ ସକାଳୁ ଜୟପୁର ଅଭିମୁଖେ ଯାତ୍ରା କରିଛନ୍ତି । ଇତି ମଧ୍ୟରେ ମହେନ୍ଦ୍ର ସିଂ ଧୋନୀଙ୍କ ଇଂଷ୍ଟାଗ୍ରାମ ଆକାଉଣ୍ଟରେ ଏକ ଫଟୋ ସେୟାର କରାଯାଇଛି, ଯେଉଁଥିରେ ଧୋନୀ ଏବଂ ସାକ୍ଷୀ ଦୁହେଁ ଏୟାରପୋର୍ଟର ଚଟାଣରେ ମୁଣ୍ଡରେ ବ୍ୟାଗ ଦେଇ ଶୋଇଥିବାର ନଜର ଆସିଛନ୍ତି ।
ଏବେ ଏହି ଫଟୋଟି ସୋସିଆଲ ମିଡିଆରେ ଭାଇରାଲ ହେବା ସହ ହଙ୍ଗାମା ମଚାଉଥିବାର ଜଣାପଡିଛି । ସେପଟେ ଚେନ୍ନାଇ ସୁପର କିଙ୍ଗସର ଅଫିସିଆଲ ଆକାଉଣ୍ଟରୁ ଏହି ଫଟୋକୁ ଟ୍ୱଟରରେ ସେୟାର କରାଯାଇଛି । ଏହି ଫଟୋକୁ ନେଇ ଫ୍ୟାନ୍ସମାନଙ୍କର ଭିନ୍ନ ଭିନ୍ନ କମେଣ୍ଟଓ ମଧ୍ୟ ଆସୁଛି ।
ଧୋନି ଏହି ଫଟୋଟିକୁ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ସେୟାର କରି ଲେଖିଛନ୍ତି କି, ‘’ ‘ଯେତେବେଳେ ଆପଣ ଆଇପିଏଲ ର ସମୟ ସହିତ ଜଡିତ ହୋଇଯାଇଥିବେ ଏବଂ ଆପଣଙ୍କ ଫ୍ଲାଇଟ୍ ସକାଳୁ ସକାଳୁ ଥିବ, ତେବେ ଆପଣଙ୍କ ପରିସ୍ଥିତି ଏଭଳି ହୋଇଯାଇଥାଏ ।’
