ଭୁବନେଶ୍ୱର (ଏଟିଆର ବ୍ୟୁରୋ ) ; ଛୋଟ ବେଳେ ସ୍ୱପ୍ନ ଦେଖିଥିଲେ , ବଡ ଘରେ ରହିବି ବିଳାସପୂର୍ଣ୍ଣ କାର ଚଢିବି । ତେବେ ଶେଷରେ ପୂରଣ ହୋଇଛି ସେହି ସ୍ୱପ୍ନ । ଦୂତୀ କିଣିଲେ କାର । ଦୈଡରାଣୀ ଦୂତୀ ଚାନ୍ଦ ଶେଷରେ ନିଜ ସ୍ୱପ୍ନ ପୂରଣ କରିପାରିଛନ୍ତି । ଆଜି ତାଙ୍କ ପସନ୍ଦର ଗାଡି ବିଏମଡବଲ୍ୟୁ କାର କିଣି ଖୁସିବ୍ୟକ୍ତ କରିଛନ୍ତି ଦୂତୀ । ପିଲାଟି ଦିନରୁ ଏହି କାରକୁ କିଣିବା ପାଇଁ ସ୍ୱପ୍ନ ଦେଖିଥିଲେ ଦୂତୀ । ସେ ନିଜ କାର କିଣିବା ଖବର ନିଜ ସୋସିଆଲ ମିଡିଆ ଆକାଉଣ୍ଟରେ ସେୟାର କରିଛନ୍ତି ।
ତେବେ ପୂର୍ବରୁ ଦୂତିଙ୍କ ପାଖରେ ଏକ ନାନୋ କାର ଥିବା ବେଳେ ବିଏମଡବଲ୍ୟୁ କାର କିଣିବା ପାଇଁ ବହୁ ଆଶା ରଖିଥିଲେ । ଶେଷରେ ଏହି କାର କିଣିବାକୁ ସେ ସକ୍ଷମ ହୋଇଛନ୍ତି । ଯାଜପୁରର ଗୋପାଳପୁରରେ ଦୂତୀଙ୍କ ଘର ରହିଥିବା ବେଳେ ସେ ନିଜ ବାପା ମାଙ୍କ ପାଇଁ ଏକ ସୁନ୍ଦର ଘର ତିଆରି କରିବାକୁ ମଧ୍ୟ ସ୍ୱପ୍ନ ଦେଖିଛନ୍ତି ।
ପ୍ରକାଶଥାଉକି , ଚଳିତବର୍ଷ ହୋଇଥିବା ଏସିଆନ ଗେମ୍ସରେ ଭାରତ ତରଫରୁ ପ୍ରତିନିଧିତ୍ୱ କରିଥିଲେ ଦୂତୀ । ଏହି ଅବସରରେ ସେ ୧୦୦ ମିଟର ଓ୨୦୦ ମିଟର ଦୌଡରେ ଭାରତ ପାଇଁ ରୌପ୍ୟ ପଦକ ଜିତିଥିଲେ । ତାଙ୍କ ପ୍ରଦର୍ଶନରେ ଖୁସି ହୋଇ ରାଜ୍ୟ ସରକାରଙ୍କ ତରଫରୁ ଦୂତୀଙ୍କ ପାଇଁ ୩ କୋଟି ଟଙ୍କାର ପୁରସ୍କାର ଘୋଷଣା କରାଯାଇଥିଲା ।
ତେବେ ଦୂତୀ ପୂର୍ବରୁ ମଧ୍ୟ ବହୁ ଜାତୀୟ ଓ ଆନ୍ତର୍ଜାତୀୟ ପ୍ରତିଯୋଗୀତା ରେ ପଦକ ଜିତିସାରିଛନ୍ତି । ନିଜ ସଂଘର୍ଷପୂର୍ଣ୍ଣ ଜୀବନରେ ସେ କଠୋର ପରିଶ୍ରମ କରି ଦେଶ ତଥା ରାଜ୍ୟ ପାଇଁ ଗୌରବ ଆଣିଥିବା ଦୂତୀଙ୍କ ଭବିଷ୍ୟତ ଆହୁରି ଲମ୍ବା ହୋଇ ପଡିରହିଛି । ସେ ଆଗକୁ ମଧ୍ୟ ନିଜ ଖେଳ ଜାରି ରଖି ଦେଶ ତଥା ରାଜ୍ୟ ପାଇଁ ସମ୍ମାନ ଆଣିବେ ବୋଲି ରାଜ୍ୟବାସୀ ଆଶା କରିଛନ୍ତି ।
