ସିଡନି (ଏଟିଆର ବ୍ୟୁରୋ ) ; ଭାରତକୁ ମିଳିଲା ୧୬୫ ରନର ବିଜୟଲକ୍ଷ୍ୟ । ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ତୃତୀୟ ତଥା ଅନ୍ତିମ ଟି – ୨୦ ମ୍ୟାଚରେ ଘରୋଇ ଅଷ୍ଟ୍ରେଲିଆ ଭାରତକୁ ୧୬୫ ରନର ବିଜୟଲକ୍ଷ୍ୟ ଦେଇଛି । ଅଷ୍ଟ୍ରେଲିଆର ସିଡନିଠାରେ ଏହି ଅନ୍ତିମ ମ୍ୟାଚ ଅନୁଷ୍ଟିତ ହୋଇଛି । ଆୟୋଜକ ଅଷ୍ଟ୍ରେଲିଆ ଟସ ଜିତି ପ୍ରଥମେ ବ୍ୟାଟିଂ କରିବା ପାଇଁ ନିଷ୍ପତି ନେଇଥିଲା । ମ୍ୟାଚ ଆରମ୍ଭରୁ ହିଁ ଅଷ୍ଟ୍ରେଲିଆ ବ୍ୟାଟସମ୍ୟାନଙ୍କ ଉପରେ ଭାରି ପଡିଥିଲେ ଭାରତୀୟ ବୋଲର ।
ବିଶେଷକରି ବାମହାତୀ ସ୍ପିନର କୁନାଲ ପାଣ୍ଡ୍ୟା ଆଜିର ମ୍ୟାଚରେ ଦମଦାର ବୋଲିଂ କରିଛନ୍ତି । କୁନାଲ ଅଷ୍ଟ୍ରେଲିଆର ୪ ଟି ଗୁରୁତ୍ୱପୁର୍ଣ୍ଣ ୱିକେଟ ନେବାରେ ସଫଳ ହୋଇଛନ୍ତି । ଅନ୍ୟପଟେ ଆଜିର ମ୍ୟାଚ ଭାରତ ପାଇଁ ବେଶ ଗୁରୁତ୍ୱପୂର୍ଣ୍ଣ ହୋଇପଡିଛି । ଆଜିର ମ୍ୟାଚକୁ ଜିତିବା ଲାଗି ଭାରତ ଲାଗି କର ବା ମର ପରିସ୍ଥିତି ସୃଷ୍ଟି ହୋଇଛି ।
ବ୍ରିସବେନରେ ଖେଳାଯାଇଥିବା ପ୍ରଥମ ମ୍ୟାଚରେ ଭାରତ ହାରିବା ପରେ ମେଲବୋର୍ଣ୍ଣରେ ଖେଳାଯାଇଥିବା ଦ୍ୱିତୀୟ ମ୍ୟାଚକୁ ବର୍ଷା ଧୋଇନେଇଥିଲା । ଯାହା ଫଳରେ ଆଜିର ମ୍ୟାଚକୁ ଜିତିବା ପାଇଁ ଭାରତ ନିଶ୍ଚିତ ଚେଷ୍ଠା କରିବ । ତେବେ ଆଜିର ମ୍ୟାଚରେ ଯଦି ଭାରତ ହାରିଯାଏ ତେବେ ଭାରତ ଲଗାଦାର ସପ୍ତମ ଶୃଙ୍ଖଳା ଜିତିବା ପରେ ଏହା ପ୍ରଥମ ପରାଜୟ ହେବ । ସେପଟେ ଭାରତ ଆଗରେ ୧୬୫ ରନର ବିଜୟଲକ୍ଷ୍ୟ ଥିବାରୁ ଭାରତ ମ୍ୟାଚକୁ କୌଣସି ବି ପରିସ୍ଥିତିରେ ଜିତିବା ଲକ୍ଷ୍ୟରେ ପଡିଆକୁ ଓହ୍ଲାଇବ ।
