ବ୍ରିଷ୍ଟଲ (ଏଟିଆର ବ୍ୟୁରୋ); ବିଶ୍ୱକପର ୧୧ତମ ମ୍ୟାଚଟି ବାତିଲ ହୋଇଛି । ମ୍ୟାଚରେ ବର୍ଷା ସାଜିଥିଲା ବାଧକ । ଶେଷରେ ପାକିସ୍ତାନ ଏବଂ ଶ୍ରୀଲଙ୍କା ପଏଣ୍ଟ ଭାଗ କରିଛନ୍ତି । ଏକ ପଏଣ୍ଟ ପାଇବା ପରେ ଶ୍ରୀଲଙ୍କା ପଏଣ୍ଟ ଟେବୁଲରେ ତୃତୀୟ ସ୍ଥାନକୁ ଉଠିଛି । ପାକିସ୍ତାନ ନେଟ ରନରେଟ ପାଇଁ ଚତୁର୍ଥ ସ୍ଥାନରେ ରହିଛି । ଶ୍ରୀଲଙ୍କା ପ୍ରଥମଥର ଲାଗି ପାକିସ୍ତାନ ବିପକ୍ଷରେ ଏଭଳି ପଏଣ୍ଟ ଭାଗ କରିଛି ।
ଉଭୟ ଦଳ ଦୁଇଟି ଲେଖାଏଁ ମ୍ୟାଚ ଖେଳିଥିବା ବେଳେ ମାତ୍ର ଗୋଟିଏ ବିଜୟ ହୋଇଛନ୍ତି । ଏଣୁ ଗତକାଲି ମ୍ୟାଚ ବିଜୟ ହେବା ପାଇଁ ଉଭୟ ପ୍ରସ୍ତୁତ ଥିଲେ । କିନ୍ତୁ ବର୍ଷା ଏମାନଙ୍କ ବାଟ ଓଗାଳିଥିଲା । ଶ୍ରୀଲଙ୍କା ପ୍ରଥମ ମ୍ୟାଚରେ ନ୍ୟୁଜିଲାଣ୍ଡଠାରୁ ହାରିଥିବା ବେଳେ ଆଫଗାନିସ୍ତାନଠାରୁ ବିଜୟ ହୋଇଥିଲା । ଦଳର ପଏଣ୍ଟ ଏବେ ପ୍ଳସରେ ରହିଛି । ପାକିସ୍ତାନ ପ୍ରଥମ ମ୍ୟାଚରେ ୱେଷ୍ଟଇଣ୍ଡିଜଠାରୁ ଲଜ୍ୱାଜନକ ପରାଜୟ ବରଣ କରିଥିଲା । କିନ୍ତୁ ପରବର୍ତ୍ତୀ ମ୍ୟଚରେ ଶକ୍ତିଶାଳି ଇଂଲଣ୍ଡକୁ ହରାଇ ପୁଣିଥରେ ସିରିଜକୁ କମବ୍ୟାକ କରିଥିଲା ।
ଗତକାଲି ସକାଳୁ ବର୍ଷା ଲାଗି ରହିଥିଲା । ଦୁଇ ଦଳ ହୋଟେଲରୁ ବାହାରି ପାରିନଥିଲେ । ତେବେ ବର୍ଷା ଟିକେ ଛାଡିବା ପରେ ପ୍ରଥମେ ପାକିସ୍ତାନ ଏବଂ ଏହାପରେ ଶ୍ରୀଲଙ୍କା ଦଳ ପଡିଆରେ ପହଁଞ୍ଚିଥିଲେ । କିନ୍ତୁ ବର୍ଷା ଲାଗି ରହିଥିଲା । ପାଗ ଟିକେ ସୁଧୁରିବା ପରେ ମଧ୍ୟ ପଡିଆର ସ୍ଥିତି ସେତେ ଭଲ ନଥିବାରୁ ମ୍ୟାଚ ରେଫରି ବାତିଲ କରିଥିଲେ । ପାକିସ୍ତାନ ଆଗାମି ମ୍ୟାଚରେ ଅଷ୍ଟ୍ରେଲିଆକୁ ଭେଟିବାକୁ ଯାଉଥିବା ବେଳେ ଶ୍ରୀଲଙ୍କା ବାଲାଂଦେଶକୁ ଭେଟିବ ।
