ସିଡନୀ (ଏଟିଆର ବ୍ୟୁରୋ); ପୁଣି ଚମକୁଛି ପୂଜାରାଙ୍କ ବ୍ୟାଟ । ଚତୁର୍ଥ ଟେଷ୍ଟରେ ବ୍ୟକ୍ତିଗତ ୯୪ କରି ଅପରାଜିତ ଅଛନ୍ତି ପୂଜାରା । ପୂର୍ବରୁ ତିନୋଟି ଟେଷ୍ଟରେ ମଧ୍ୟ ସେ ଶତକୀୟ ପାଳି ଖେଳିଥିବା ଦେଖିବାକୁ ମିଳିଥିଲା । ତେବେ ଶେଷ ଟେଷ୍ଟରେ ପୂଜାରାଙ୍କ ଭଲ ପ୍ରଦର୍ଶନ ପାଇଁ ଦଳ ମଧ୍ୟ ଭଲ ସ୍ଥିତିରେ ରହିଛି । ରିପୋର୍ଟ ଲେଖାଯିବା ପର୍ଯ୍ୟନ୍ତ ଭାରତ ୨୨୮ ରନ କରି ୪ ଗୋଟି ୱିକେଟ ହରାଇଛି । ଦଳ ପକ୍ଷରୁ ପୂଜାରା ଏବଂ ହନୁମାନ ବିହାରୀ ବ୍ୟାଟିଂ ଜାରି ରଖିଛନ୍ତି ।
ଟସ ଜିତି ଭାରତ ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲା । ତେବେ ଦଳ ପକ୍ଷରୁ ରାହୁଲ ଏବଂ କୋହଲି ନୈରାଶ୍ୟଜନକ ଖେଳ ପ୍ରଦର୍ଶନ କରିଛନ୍ତିି । ରାହୁଲ ମାତ୍ର ୯ ରନ କରିଥିବା ବେଳେ କୋହଲି ୨୮ ରନ କରିବାରେ ସଫଳ ହୋଇଛନ୍ତି । ପୂର୍ବ ମ୍ୟାଚ ଭଳି ଏହି ମ୍ୟାଚରେ ମଧ୍ୟ ମୟଙ୍କଙ୍କ ବ୍ୟାଟରୁ ଦେଖିବାକୁ ମିଳିଥିଲା ଦର୍ଶନୀୟ ସଟ । ସେ ବ୍ୟକ୍ତିଗତ ୭୭ ରନ କରି ଆଉଟ ହୋଇଯାଇଛନ୍ତି । ସେପଟେ କଙ୍ଗାରୁ ବାହିନୀ ପକ୍ଷରୁ ହାଜେଲ ହୁଡ ୨ଟି ୱିକେଟ ନେଇଥିବା ବେଳେ ଷ୍ଟାର୍କ ଏବଂ ଲିୟନ ଗୋଟିଏ ଲେଖାଏଁ ୱିକେଟ ନେବାରେ ସଫଳ ହୋଇଛନ୍ତି ।
