ନୂଆଦିଲ୍ଲୀ(ଏଟିଆର ବ୍ୟୁରୋ): ଭାରତୀୟ ଷ୍ଟାର ବୋଲର ତଥା ସ୍ପିନର ହରଭଜନ ସିଂ ବିସିସିଆଇ ଚୟନ କମିଟିର ଚୟନ ପ୍ରକ୍ରିୟାକୁ କଡା ସମାଲୋଚନା କରିବା ସହିତ ଟ୍ୱିଟ କରି ଅସୋନ୍ତଷ ଜାହିର କରିଛନ୍ତି ।
ବାରମ୍ବାର ଡୋମେଷ୍ଟିକରେ ଭଲ ପ୍ରଦର୍ଶନ କରୁଥିବା ମୁମ୍ବାଇ ଷ୍ଟାର ସୂର୍ଯ୍ୟ କୁମାରଙ୍କୁ କଣ ପାଇଁ ଭାରତୀୟ ଦଳରେ ସ୍ଥାନ ମିଳୁନାହିଁ ବୋଲି ପ୍ରଶ୍ନ କରିଛନ୍ତି ହରଭଜନ ।
ଆଗାମୀ ଶ୍ରୀଲଙ୍କା ଓ ଅଷ୍ଟ୍ରେଲିଆ ବିପକ୍ଷରେ ହେବାକୁ ଥିବା ସିରିଜ ମ୍ୟାଚ ପାଇଁ ଭାରତୀୟ ଦଳ ଘୋଷଣା ହୋଇ ସାରିଛି । ତେବେ ଉଭୟ ଟୁର୍ଣ୍ଣାମେଣ୍ଟ ପାଇଁ ଦଳରେ ସୂର୍ଯ୍ୟକୁମାର ଯାଦବଙ୍କୁ ସ୍ଥାନ ମିଳିନାହିଁ । ତେବେ ବାରମ୍ବାର ଭଲ ପ୍ରଦର୍ଶନ କରୁଥିଲେ ହେଁ ସୂର୍ଯ୍ୟକୁମାରଙ୍କୁ କଣ ପାଇଁ ଦଳରେ ସାମିଲ କରାଯାଉନାହିଁ ପ୍ରଶ୍ନ କରି ଚୟନ କମିଟି ଉପରେ ଆଙ୍ଗୁଳି ଉଠାଇଛନ୍ତି ହରଭଜନ ସିଂ ।
ସୂର୍ଯ୍ୟକୁମାର ବର୍ତ୍ତମାନ ସୁଦ୍ଧା ୭୩ଟି ରଣଜି ମ୍ୟାଚରୁ ୪୯୨୦ରନ ସଂଗ୍ରହ କରିଥିବାବେଳେ ୧୪୯ଟି ଟି-ଟ୍ୱଣ୍ଟି ମ୍ୟାଚରୁ ୩୦୧୨ ରନ କରିଛନ୍ତି । ସେପଟେ ହରଭଜନଙ୍କ ଏଭଳି ଟ୍ୱିଟ ପରେ ସୂର୍ଯ୍ୟକୁମାରଙ୍କୁ କେବେ ଦଳରେ ସ୍ଥାନ ମିଳୁଛି ଦେଖିବାକୁ ବାକି ରହିଲା ।
