ଲଣ୍ଡନ (ଏଟିଆର ବ୍ୟୁରୋ ); ଚଳିତ ବିଶ୍ୱକପରେ ଆଜି ଦକ୍ଷିଣ ଆଫ୍ରିକାକୁ ଭେଟିବ ଶ୍ରୀଲଙ୍କା । ଦକ୍ଷିଣ ଆଫ୍ରିକାର ସେମି ଆଶା ମଉଳି ଯାଇଥିବା ବେଳେ ଶ୍ରୀଲଙ୍କା ଆଜି ଯଦି ଜିତେ ତେବେ ସେମିଫାଇନାଲ ରାସ୍ତାରେ ଆଉ ଗୋଟିଏ ପାଦ ଆଗକୁ ଚଢ଼ିବ । ଦଳ ଚଳିତ ବିଶ୍ୱକପରେ ୬ ମ୍ୟାଚରୁ ୬ ପଏଣ୍ଟ ପାଇଛି । ବାକି ତିନୋଟି ମ୍ୟାଚ ଜିତିଲେ ଦଳ ସେମିଫାଇନାଲରେ ପହଁଞ୍ଚିବ ।
ଆଜି ମ୍ୟାଚଟି ମୁଖ୍ୟତଃ ଜିତିବା ସହିତ ମନୋବଳ ବଢ଼ାଇବା ପାଇଁ ଚେଷ୍ଟା କରିବ ଶ୍ରୀଲଙ୍କା । ଦଳ ମୁଖ୍ୟତଃ ବୋଲିଂରେ ଅଭିଜ୍ଞ ମାଲିଙ୍ଗାଙ୍କ ଉପରେ ନିର୍ଭର କରିବ । କାରଣ ଶେଷ ମ୍ୟାଚରେ ଇଂଲଣ୍ଡକୁ ବ୍ୟାଟ୍ସମ୍ୟାନଙ୍କୁ ମାଲିଙ୍ଗା ଏକା ପାଣି ପିଆଇ ଦେଇଥିଲେ । ଏଣୁ ଦଳ ତାଙ୍କୁ ମୁଖ୍ୟ ଅସ୍ତ୍ର କରି ମୈଦାନକୁ ଓହ୍ଲାଇବ । ତେବେ ଦଳର ଅନ୍ୟ ଖେଳାଳିମାନେ ମଧ୍ୟ ଭଲ ଫର୍ମରେ ଅଛନ୍ତି ।
ଆଜି ମ୍ୟାଚ ପରେ ଶ୍ରୀଲଙ୍କା ୱେଷ୍ଟ ଇଣ୍ଡିଜ ଏବଂ ଭାରତକୁ ଭେଟିବ । ଏଣୁ ଦଳ ଆଜି ମ୍ୟାଚକୁ ଅଧିକ ଗୁରୁତ୍ୱ ଦେବ । ଦକ୍ଷିଣ ଆଫ୍ରିକା ଚଳିତ ବିଶ୍ୱକପରେ ମାତ୍ର ଗୋଟିଏ ମ୍ୟାଚ ଜିତିଛି । ଲଗାତାର ହାରିବା ପରେ ଦଳର ମନୋବଳ ଦୁର୍ବଳ ହୋଇ ପଡିଛି । ଯାହାର ଫାଇଦା ଉଠାଇବା ପାଇଁ ଚେଷ୍ଟା କରିବ ଶ୍ରୀଲଙ୍କା । ଦକ୍ଷିଣ ଆଫ୍ରିକୀୟ ସ୍ପିନର ତାହିରଙ୍କୁ ଟାର୍ଗେଟ କରିବ ଶ୍ରୀଲଙ୍କା । ତାହିର ଏବେ ଭଲ ସ୍ପେଲରେ ବୋଲିଂ ଜାରି ରଖିଛନ୍ତି । ଏଣୁ ତାଙ୍କ ବଲକୁ ଜଗି ରଖି ଖେଳିବା ପାଇଁ ଚେଷ୍ଟା କରିବେ ।
