ନୂଆଦିଲ୍ଲୀ,(ଏଟିଆର ବ୍ୟୁରୋ): ଆମେରିକାରେ ଘଟିଛି ଏକ ଭୟାବହ ବିଷ୍ଫୋରଣ । ପାଖାପାଖି ୭୦ଟି ଜାଗାରେ ନିଆଁ ଲାଗିଯିବା ସହ ଘଟଣାରେ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । କେବଳ ଏତିକି ନୁହେଁ ୧୨ରୁ ଅଧିକ ଲୋକ ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରାଯାଇ ହସପିଟାଲରେ ଭର୍ତ୍ତି କରାଯାଇଛି ।
ରିପୋର୍ଟ ଅନୁସାରେ, ବ୍ଲାଷ୍ଟନରେ ଗ୍ୟାସ ପାଇପ ଲାଇନ ବିଷ୍ଫୋରଣ ହୋଇଛି । ଏହି ଘଟଣା ପରେ ଆଖପାଖ ଅଞ୍ଚଳରେ ରହୁଥିବା ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନକୁ ନିଆଯାଇଛି । ପୂରା ଅଞ୍ଚଳରେ ଏହି ଘଟଣାକୁ ନେଇ ଆତଙ୍କ ଖେଳିଯାଇଛି । ଅଚାନକ ବ୍ଲାଷ୍ଟ ପରେ ପୂରା ଏରିଆ ଧୂଆଁ ମୟ ହୋଇଯାଇଥିଲା ।
ଖବର ପାଇ ପୁଲିସ ଓ ଅଗ୍ନିଶମ କର୍ମଚାରୀମାନେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ପୁଲିସ ରିପୋର୍ଟ ଅନୁସାରେ, ଏହି ବ୍ଲାଷ୍ଟଯୋଗୁ ୭୦ଟି ସ୍ଥାନରେ ନିଆଁ ଲାଗିଯାଇଛି । ଆହତଙ୍କୁ ଲାରେନ୍ସ ହସପିଟାଲରେ ଭର୍ତ୍ତି କରାଯାଇଛି । ଏବେ ବି ଉଦ୍ଧାର କାର୍ଯ୍ୟ ଜାରି ରହିଥିବା ଜଣାପଡିଛି ।
