ଯାଜପୁର (ଏଟିଆର ବ୍ୟୁରୋ ) ;ଗଛରେ ଦଉଡି ଦେଇ ଆତ୍ମହତ୍ୟା କଲେ ଚାଷୀ । ଋଣଭାର ସହିନପାରି ଶେଷରେ ଆତ୍ମହତ୍ୟାର ବାଟ ବାଛିନେଲେ ଜଣେ ଚାଷୀ । ଏଭଳି ଦୁଃଖଦ ଘଟଣା ଯାଜପୁର ଜିଲ୍ଲା ଧର୍ମଶାଳା ବ୍ଲକର ମଙ୍ଗରାଜପୁର ଠାରେ ଘଟିଛି । ଯାହାକୁ ନେଇ ସମଗ୍ର ଅଞ୍ଚଳରେ ଦୁଃଖର ଛାୟା ଖେଳିଯାଇଛି ।
ଆଜି ସକାଳେ ଚାଷୀ ଜଣକ ଏକ ଗଛରେ ଦଉଡି ଦେଇ ଅତ୍ମହତ୍ୟା କରିଥିବା ଜଣାପଡିଛି । ମୃତ ଚାଷୀ ଜଣକ ହେଲେ ମଙ୍ଗରାଜପୁର ଗ୍ରାମର ଗୌରାଙ୍ଗ ବଳ । ସୂଚନା ଅନୁସାରେ , ଗୌରାଙ୍ଗ ସେହି ଗ୍ରାମର ଜଣେ ଆଗଧାଡିର ଚାଷୀ ବୋଲି ଜଣାପଡିଛି । ସେ ନିଜ ଚାଷ କାମ ପାଇଁ ବିଭିନ୍ନ ବ୍ୟାଙ୍କ ଓ କେତୋଟି ସଂସ୍ଥା ଠାରୁ ଋଣ ଆଣିଥିଲେ । ତେବେ ଚାଷରେ ସେତେଟା ଲାଭ ମିଳିନଥିଲା ଗୌରାଙ୍ଗଙ୍କୁ । ମୁଣ୍ଡରେ ଋଣଭାର ଥିବାରୁ ଚିନ୍ତାରେ ପଡିଥିଲେ ଗୌରାଙ୍ଗ । କରଜ ସୁଝିବା ଚିନ୍ତାରେ ଗୌରାଙ୍ଗ ସବୁବେଳେ ରହୁଥିବା କହିଛନ୍ତି ତାଙ୍କ ପତ୍ନୀ ।
ତେବେ ଆଜି ସକାଳେ ଘର ପଛରେ ଥିବା ଏକ ଗଛରେ ଦଉଡି ଦେଇ ଗୌରାଙ୍ଗ ଆତ୍ମହତ୍ୟା କରିଥିବା ପରିବାର ଲୋକେ କହିଛନ୍ତି । ସେପଟେ ଗୌରାଙ୍ଗଙ୍କ ଆତ୍ମହତ୍ୟା ସମ୍ପର୍କରେ କୌଣସି ପ୍ରଶାସନିକ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ । ଏପଟେ ଗୌରାଙ୍ଗଙ୍କ ମୃତ୍ୟୁ କୁ ନେଇ ଗ୍ରାମରେ ଶୋକ ଖେଳିଯାଇଛି ।
