ମୁମ୍ବାଇ (ଏଟିଆର ବ୍ୟୁରୋ): ବଲିଉଡ ଅଭିନେତା ସୈଫ୍ ଅଲ୍ଲୀ ଖାଁଙ୍କ ଝିଅ ସାରା ଅଲ୍ଲୀ ଖାଁଙ୍କ ଡେବ୍ୟୁ ଫିଲ୍ମ ‘କେଦାରନାଥ’ପାଇଁ ଦର୍ଶକ ଅନେକ ଦିନ ଧରି ଅପେକ୍ଷା କରି ରହିଥିଲେ । ଏବେ ଅପେକ୍ଷାର ଅନ୍ତ ଘଟିଛି । ଆଜ୍ଞା ହଁ ସାରା ଅଲ୍ଲୀ ଏବଂ ଶୁସାନ୍ତ ସିଂ ରାଜପୁତଙ୍କ ଅପକମିଂ ଫିଲ୍ମ ‘କେଦାରନାଥ’ର ପୋଷ୍ଟର ସହ ଟିଜର ମଧ୍ୟ ରିଲିଜ୍ ହୋଇସାରିଛି । ଏଥିରେ ଦୁହିଁଙ୍କ ମଧ୍ୟରେ ଥିବା ଜବରଦସ୍ତ କେମେଷ୍ଟ୍ରି ଦେଖିବାକୁ ମିଳିଛି ।
ଫିଲ୍ମର ଫାଷ୍ଟ ପୋଷ୍ଟରକୁ ସାରା ତାଙ୍କ ଇଂଷ୍ଟାଗ୍ରାମ ଆକାଉଣ୍ଟରେ ସେୟାର କରିଛନ୍ତି । ଏଥିରେ ସୁଶାନ୍ତ ସାରାଙ୍କୁ ପିଠିରେ ବୋହିକି ପାହାଡ ଚଢୁଥିବାର ନଜର ଆସୁଛନ୍ତି । ଏହାସହିତ ଗୋଟେ ମିନିଟ୍ ୪୦ ସେକେଣ୍ଡର ଏହି ଟିଜରରେ ପ୍ରାକୃତିକ ତାଣ୍ଡବର ଭୟାନକ ଦୃଶ୍ୟ ସହ ହିରୋ ଓ ହିରୋଇନଙ୍କ ମଧ୍ୟରେ ଭଲ ପାଇବା ଦେଖିବାକୁ ମିଳିଛି ।
ଅଭିଶେକ କପୁରଙ୍କ ଦ୍ୱାରା ନିର୍ଦ୍ଦେଶିତ ଫିଲ୍ମ ‘କେଦାରନାଥ’ରେ ମୁଖ୍ୟ ଭୂମିକାରେ ନଜର ଆସିବେ ସୁଶାନ୍ତ ଏବଂ ସାରା । ଏହାର ପ୍ରଯୋଜନା ଦାୟିତ୍ୱରେ ଅଛନ୍ତି ରୋନି ସ୍କୃବାଲା ଏବଂ ପ୍ରଜ୍ଞା କପୁର । ଶେଷରେ ଫିଲ୍ମକୁ ନେଇ ଦୁଇ ପ୍ରଯୋଜକଙ୍କ ମଧ୍ୟରେ ଲାଗିଥିବା ବିବାଦରେ ଅନ୍ତ ଘଟିଛି । ଫିଲ୍ମଟି ଚଳିତ ବର୍ଷ ଡିସେମ୍ବର ୭ରେ ପ୍ରେକ୍ଷାଳୟରେ ମୁକ୍ତିଲାଭ କରିବ ।
