ଆନନ୍ଦପୁର (ଏଟିଆର ବ୍ୟୁରୋ) ; ରୋଷେଇ କରୁଥିବାବେଳେ ଫାଟିଲା ଉଜ୍ୱଳା ଗ୍ୟାସ ଟାଙ୍କୀ । ଚୁରମାର ହୋଇଗଲା ଦୁଇ ବଖରା ଘର । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଅନନ୍ଦପୁର ହାଟଡିହି ଅକରୁଆ ଗାଁରେ । ମିଳିଥିବା ସୂଚନା ମୁତାବକ ସେହିଗ୍ରାମର ଆତୁଳ ଜେନାଙ୍କ ଘରେ ସନ୍ଧ୍ୟାରେ ରୋଷେଇ ହେଉଥିବା ବେଳେ ହଠାତ ଜଳିଯାଇଥିଲା ଗ୍ୟାସ ଟାଙ୍କୀ । ଏହା ଦେଖିବା ପରେ ପରିବାର ଲୋକ ନିଜର ଜୀବନ ବଞ୍ଚାଇବା ପାଇଁ ଘରୁ ବାହାରକୁ ଦୈଡି ପଳେଇଥିଲେ । କିଛି ସମୟ ଜଳିବା ଟାଙ୍କୀଟି ଫାଟି ଯାଇଥିଲା ।
ଘରେ ଥିବା ମୁଗ,ବିରି,ଧାନ ଚାଉଳ ଏବଂ ଘରର ବହୁ ମୂଲ୍ୟବାନ ଜିନିଷ ନଷ୍ଟ ହୋଇଯାଇଛି । ଦୁଇ ବଖରା ଘର ଜଳି ପାଉଁଷ ହୋଇଯାଇଥିବା ବେଳେ ବାକି କାନ୍ଥ ସବୁ ଫାଟି ଯାଇଛି । ଘର ଭାଙ୍ଗି ଯାଇଥିବା ବେଳେ ସାମଗ୍ରୀ ନଷ୍ଟ ହୋଇଯାଇଛି । ଫଳରେ ସରକାରୀ ସହାୟତା ପାଇଁ ଅନେଇ ବସିଛନ୍ତି ଆତୁଳ ଜେନାଙ୍କ ପରିବାର ।
ନାରୀ ମାନଙ୍କୁ ସମ୍ମାନ ଦେବା ପାଇଁ ଦିଆଯାଇଥିବା ଉଜ୍ୱଳା ଶେଷରେ ମାକୁ ଦାଣ୍ଡରେ ଠିଆ କରେଇ ଦେଇଛି । କେନ୍ଦ୍ର ସରକାରଙ୍କ ଉଜ୍ୱଳା ଯୋଜନାରେ ଦିଆଯାଇଥିବା ଗ୍ୟାସ ଗୋଟିଏ ପରେ ଗୋଟିଏ ଫାଟୁଥିବା ନଜରକୁ ଆସିଛି । ସେପଟେ ଗ୍ୟାସର ଦାମ ବଢ଼ୁଥିବା ବେଳେ ଏପଟେ ଏପରି ଫାଟିବା ଦୃଶ୍ୟ ସମସ୍ତଙ୍କୁ ଚକିତ କରେଇ ଦଉଛି । ଜୀବନ ନ ଯାଇଥିଲେ ମଧ୍ୟ ଫାଟବା ପାଇଁ ବହୁ ସମ୍ପତ୍ତିମାନ ନଷ୍ଟ ହୋଇଯାଉଛି ।
