ବାଲେଶ୍ୱର,(ଏଟିଆର ବ୍ୟୁରୋ): ବର୍ଷ ଆରମ୍ଭରୁ ହିଁ ବାଲେଶ୍ୱରରେ ଘଟିଲା ଅଘଟଣ । ବାଲି ବୋଝେଇ ଟ୍ରକ ଧକ୍କାରେ ଆଖି ବୁଜିଲେ ମହିଳା । ମୃତ ମହିଳାଙ୍କ ନାଁ ଜ୍ୟୋତ୍ସ୍ନା ବେହେରା । କେବଳ ଏତିକି ନୁହେଁ ଦୁର୍ଘଟଣାରେ ମୃତ ଜ୍ୟୋତ୍ସ୍ନାଙ୍କ ଝିଅ ନୈନା ମଧ୍ୟ ଗୁରୁତର ଆହତ ହୋଇଛନ୍ତି । ତେବେ ଏହି ଦୁର୍ଘଟଣାକୁ ନେଇ ଉତ୍ତେଜନା ପ୍ରକାଶ ପାଇଥିଲା । ପୁଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିବା ବେଳେ ଦୁର୍ଘଟଣା ଘଟାଇଥିବା ଟ୍ରକକୁ ଜବତ କରିଛି ।
ମିଳିଥିବା ରିପୋର୍ଟ ଅନୁସାରେ, ଖନ୍ତାପଡା ଥାନା ଆରୁଆବାଡ ଗାଁର ଜ୍ୟୋତ୍ସ୍ନା ସ୍କୁଟିରେ ନିଜ ଝିଅଙ୍କୁ ଧରି ବାଲେଶ୍ୱର ଯାଉଥିଲେ । ତେବେ ବାଟରେ ଏକ ବାଲି ବୋଝେଇ ଟ୍ରକ ପଛପଟୁ ସ୍କୁଟିକୁ ଧକ୍କା ଦେଇଥିଲା । ଘଟଣାସ୍ଥଳରେ ହିଁ ଜ୍ୟୋତ୍ସ୍ନାଙ୍କ ମୃତ୍ୟୁ ହୋଇଥିବା ବେଳେ ଗୁରୁତର ଆହତ ହୋଇଛନ୍ତି ନୈନା । ସ୍ଥାନୀୟ ଲୋକେ ଘଟଣାକୁ ନେଇ ହଙ୍ଗାମା କରିବା ସହ ରାସ୍ତା ଅବରୋଧ କରିଥିଲେ । ଫଳରେ ଯାତାୟତ ଏକ ପ୍ରକାର ଠପ ହୋଇଯାଇଥିଲା । ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିଛି ।
