ଭୁବନେଶ୍ୱର,(ଏଟିଆର ବ୍ୟୁରୋ): ପୁଣି ବିଳମ୍ବିତ ରାତିରେ ଫୁଟିଲା ଗୁଳି । ତମାଣ୍ଡୋ ଥାନା ପାତ୍ରପଡ଼ା ଅଞ୍ଚଳରେ ଗୁଳିମାଡ଼ ହୋଇଛି । ଘଟଣାରେ ସଚିତ୍ର ଇନ୍ଦ୍ରଜିତ ଓରଫ ଟୁକୁ ନାମକ ବ୍ୟକ୍ତି ଆହତ ହୋଇଥିବା ସୂଚନା ମିଳିଛି । ଗୁରୁତର ଅବସ୍ଥାରେ ତାଙ୍କୁ ଚିକିତ୍ସା ଲାଗି ଏକ ଘରୋଇ ହସ୍ପିଟାଲରେ ଭର୍ତି କରାଯାଇଛି । ଗୁଳିମାଡ଼ ପଛର କାରଣ ଜଣାପଡି ନାହିଁ ।ପୁର୍ବଶତ୍ରୁତାକୁ କେନ୍ଦ୍ରକରି ଏହି ଗୁଳିମାଡ଼ ହୋଇଥିବା ପୁଲିସ୍ ଅନୁମାନ କରୁଛି ।
ସୂଚନା ମୁତାବକ, ଟୁକୁ ଗତକାଲି ରାତିରେ କଳିଙ୍ଗବିହାରରୁ ଭୋଜି ସାରି ଫେରୁଥିବା ବେଳେ କିଛି ଅଜଣା ଦୁର୍ବୁତ୍ତ ତାଙ୍କୁ ଉପରକୁ ୬ ରାଉଣ୍ଡ ଗୁଳି ଚଳାଇଥିଲେ । ସେଥିମଧ୍ୟରୁ ୪ରାଉଣ୍ଡ ଗୁଳି ତାଙ୍କୁ ବାମ ଜଙ୍ଘରେ ବାଜିଥିଲା । ଅଞ୍ଚଳର ରାଜୁ ବାରିକ ଓ ତାଙ୍କ ସହଯୋଗି ଏଭଳି କାଣ୍ଡ ଭିଆଇଥିବା ଟୁକୁଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିବା ଜଣାପଡିଛି ।
ତେବେ ସୁକ୍ରବାର ବିଳମ୍ବିତ ରାତିରେ ଘଟିଥିବା ଏହି ଘଟଣା ସ୍ଥାନୀୟ ଲୋକଙ୍କୁ ଆତଙ୍କିତ କରି ପକାଇଛି । ପୁରା ଘଟଣାର ତଦନ୍ତ ପୁଲିସ୍ କରୁଛି । ପୁଲିସ ଘଟଣାସ୍ଥଳରୁ ଗୁଳି ଖୋକା ଜବତ କରିଛି ।
