ମୁମ୍ବାଇ (ଏଟିଆର ବ୍ୟୁରୋ): ଦୀର୍ଘ ଦିନର ଅପେକ୍ଷା ପରେ ଶେଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ହୋଇଥିବା ବାୟାପିକ୍ ‘ପିଏମ୍ ନରେନ୍ଦ୍ର ମୋଦି’ର ଟ୍ରେଲର ବୁଧବାର ରିଲିଜ୍ ହୋଇଛି ।
ଏହି ଫିଲ୍ମରେ ପ୍ରଧାନମନ୍ତ୍ରୀ ମୋଦିଙ୍କ ଭୂମିକାରେ ଅଭିନେତା ବିବେକ୍ ଓବରାୟଙ୍କୁ ଦେଖିବାକୁ ମିଳିବ । ଦୀର୍ଘ ସମୟ ବ୍ୟବଧାନ ପରେ ବିବେକ ଏହି ମହତ୍ୱକାଂକ୍ଷୀ ପ୍ରୋଜେକ୍ଟରେ କାମ କରୁଛନ୍ତି । ଅନଲାଇନ୍ ରେ ରିଲିଜ୍ ହୋଇଥିବା ଏହି ଟ୍ରେଲରରେ ନରେନ୍ଦ୍ର ମୋଦିଙ୍କ ଜୀବନୀ ଦର୍ଶାଯାଇଛି । ଏଥିରେ ମୋଦିଙ୍କ ଛୋଟ ପିଲା ଦିନରୁ ନେଇ ପ୍ରଧାନମନ୍ତ୍ରୀ ହେବାର ସଂଘର୍ଷକୁ ଦେଖାଯାଇଛି ।
ମୁମ୍ବାଇରେ ଆୟୋଜିତ ହୋଇଥିବା ଏକ କାର୍ଯ୍ୟକ୍ରମରେ ଏହି ଟ୍ରେଲର ଲଞ୍ଚ କରାଯାଇଛି । ଯେଉଁଥିରେ ଫିଲ୍ମର ସମସ୍ତ ମୁଖ୍ୟ କଳାକାରମାନେ ସାମିଲ ଥିଲେ । ଏହି ଫିଲ୍ମର ନିର୍ଦ୍ଦେଶନା ଉମଙ୍ଗ କୁମାର ଦେଇଛନ୍ତି । ଯିଏ ପୂର୍ବରୁ ମ୍ୟାରିକମ୍ ଏବଂ ସରବଜିତ୍ ଭଳି ସଫଳ ଫିଲ୍ମ କରିସାରିଛନ୍ତି ।
ଫିଲ୍ମରେ ବିବେକ୍ ଙ୍କ ବ୍ୟତିତ ବମନ ଇରାନୀ, ବରଖା ବିଷ୍ଟ, ମନୋଜ ଜୋଶୀ, ପ୍ରଶାନ୍ତ ନାରାୟଣ, ରାଜେନ୍ଦ୍ର ଗୁପ୍ତା, ଜରୀନା ବହାବ ଏବଂ ଅଞ୍ଜନ ଶ୍ରୀବାସ୍ତବ ଆଦି ପ୍ରମୁଖ ଭୂମିକାରେ ନଜର ଆସିବେ । ଲୋକସଭା ନିର୍ବାଚନ ପୂର୍ବରୁ ଫିଲ୍ମଟି ପରଦାରେ ମୁକ୍ତିଲାଭ କରିବ ।
