ବାରିପଦା (ଏଟିଆର ବ୍ୟୁରୋ); ବାଇକ ଏବଂ ଆମ୍ବୁଲାନ୍ସ ସାମନା ସାମନି ଧକ୍କା ହୋଇଛି । ଘଟଣାସ୍ଥଳରେ ୨ଜଣଙ୍କର ମୃତ୍ୟୁ ହୋଇଛି । ତେବେ ଏଭଳି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି ବାରିପଦା-ଉଦଳା ରାସ୍ତା କରଞ୍ଜିଆ ନିକଟରେ । ମୃତକ ଦ୍ୱୟ ହେଲେ ହୃଷିକେଶ ସରଘରିଆ ଏବଂ ବିଶିକେଶ ପୃଷ୍ଟି । ଉଭୟଙ୍କ ଘର ବଡସାହି ଥାନା ଅନ୍ତର୍ଗତ ଉଠାଣୀ ନୂଆଗାଁରେ । ପୋଲିସ ଖବର ପାଇବା ପରେ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ଅପରପକ୍ଷରେ ଆମ୍ବୁଲାନ୍ସ ଡାଇଭରଙ୍କୁ ଅଟକ ରଖିଛି ପୋଲିସ ।
ପୋଲିସ ରିପୋର୍ଟ ମୁତାବକ ହୃଷିକେଶ ଏବଂ ବିଶିକେଶ ଉଭୟ ଏକ ଲୁଗା ଦୋକାନରେ କାମ କରୁଥିଲେ । ଦୋକାନ ବନ୍ଦ ହେବା ପରେ ଉଭୟ ବିଳମ୍ବିତ ରାତିରେ ଘରକୁ ଫେରିଥିଲେ । ବାଇକ ଯୋଗେ ଘରକୁ ଆସୁଥିବା ବେଳେ ହଠାତ କରଞ୍ଜିଆ ଛକ ନିକଟରେ ଆମ୍ବୁଲାନ୍ସଟି ଆସି ବାଇକକୁ ଧକ୍କା ଦେଇଥିଲା । ଏତେ ଜୋରରେ ମାଡ ହୋଇଥିଲା କି ଘଟଣାସ୍ଥଳରେ ହିଁ ଦୁହିଁଙ୍କର ମୃତ୍ୟୁ ହୋଇଥିଲା । ଅପରପକ୍ଷରେ ଖସି ପଳାଇବା ପାଇଁ ଚେଷ୍ଟା କରୁଥିବା ଆମ୍ବୁଲାନ୍ସ ଡ୍ରାଇଭରଙ୍କୁ ସ୍ଥାନୀୟ ଲୋକ କାବୁ କରି ନେଇଥିଲେ ।
ପୋଲିସକୁ ଖବର ଦେବା ପରେ ଘଟଣାସ୍ଥଳରେ ପୋଲିସ ପହଁଞ୍ଚି ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ସ୍ଥାନୀୟ ଲୋକ ଆମ୍ବୁଲାନ୍ସ ଡ୍ରାଇଭରଙ୍କୁ ପୋଲିସ ଜିମା ଦେବା ପରେ ତାକୁ ଅଟକ ରଖାଯାଇଛି । ତେବେ ଗୋଟିଏ ଗାଁର ଦୁଇଜଣଙ୍କର ଅକାଳରେ ମୃତ୍ୟୁ ହୋଇଥିବାରୁ ଗାଁରେ ଦୁଃଖର ଛାୟା ଖେଳିଯାଇଛି ।
