ପୁରୀ (ଏଟିଆର ବ୍ୟୁରୋ); ଶ୍ରୀଜିୟୁଙ୍କ ଦର୍ଶନ କଲେ ବଲିଉଡ ସୁପରଷ୍ଟାରୂ ମିଥୁନ ଚକ୍ରବର୍ତ୍ତୀ । ଗତକାଲି ରାତିରେ ସେ ପୁରୀରେ ପହଁଞ୍ଚିଥିଲେ । ଗୁରୁବାର ସକାଳୁ ସେ ଶ୍ରୀମନ୍ଦିରରେ ପହଁଞ୍ଚି ଶ୍ରୀଜିୟୁଙ୍କ ଦର୍ଶନ କରିସାରିଛନ୍ତି । ଚତୁର୍ଦ୍ଧମୂର୍ତ୍ତିଙ୍କ ଦର୍ଶନ କରିବା ସହିତ ସେ ବିଳମା ଦେବୀ,ସରସ୍ୱତୀ ଏବଂ ମହାଲକ୍ଷ୍ମୀଙ୍କ ମନ୍ଦିର ବୁଲି ଆଶିର୍ବାଦ ମଧ୍ୟ ନେଇଛନ୍ତି । ଏହାପରେ ସେ ଆନନ୍ଦ ବଜାର ବୁଲି ଦେଖିଛନ୍ତି । ଆଜି ଅପରାହ୍ନରେ ସେ ବ୍ରାହ୍ମଣ ଭୋଜନ ଦେବେ ବୋଲି ସୂଚନା ମିଳିଛି ।
ମିଥୁନ ଚକ୍ରବର୍ତ୍ତୀ ଶ୍ରୀଜିଉଙ୍କ ଦର୍ଶନ ବେଳେ ତାଙ୍କ ସହ ତାଙ୍କର ଯାତ୍ରୀପଣ୍ଡା ତଥା ବରିଷ୍ଠ ଦଇତାପତି ରାମକୃଷ୍ଣ ଦାସମହାପାତ୍ର ଉପସ୍ଥିତ ଥିଲେ। ମିଥୁନ ଚକ୍ରବର୍ତ୍ତୀ ପ୍ରଥମେ ସିଂହଦ୍ୱାର ନିକଟରୁ ପତିତପାବନଙ୍କୁ ମୁଣ୍ଡିଆ ମାରିଥିଲେ। ଭିତରକାଠ ନିକଟରୁ ମହାପ୍ରଭୁଙ୍କ ଅବକାଶ ନୀତି ଦର୍ଶନ କରିବା ସହ ବେହରଣ ଦ୍ୱାର ଦେଇ ବାହାରକୁ ଆସିଥିଲେ। ମିଥୁନଙ୍କ ଦର୍ଶନ ସମୟରେ ମନ୍ଦିର ପ୍ରଶାସନ ପକ୍ଷରୁ ତାଙ୍କ ପାଇଁ ବ୍ୟବସ୍ଥା କରାଯାଇଥିଲା । ମିଥୁନ ଗଣମାଧ୍ୟମ ପ୍ରତିନିଧିଙ୍କ ବିଶେଷ କିଛି ପ୍ରତିକ୍ରିୟା ଦେଇନାହାଁନ୍ତି । ସେ କହିଛନ୍ତି ମହାପ୍ରଭୁଙ୍କ ଆଗରେ ଆଉ କଣ କହିବି । କିଛିଦିନ ପୂର୍ବରୁ ସେ ଅସୁସ୍ଥ ଅଛନ୍ତି । ଦୀର୍ଘଦିନ ମେଡିକାଲରେ ରହିବା ପରେ ଏବେ ଟିକେ ସୁସ୍ଥ ହୋଇ ଫେରିଛନ୍ତି ମିଥୁନ । ତେବେ ପ୍ରଥମେ ମହାପ୍ରଭୁଙ୍କ ଦର୍ଶନ କରି ଆଶିର୍ବାଦ ପାଇଁ ଓଡିଶା ଆସିଥିବାରୁ ଓଡିଶା ପାଇଁ ମଧ୍ୟ ଖୁସିର କଥା ।
