କେନ୍ଦୁଝର (ଏଟିଆର ବ୍ୟୁରୋ); ସମ୍ପର୍କ ଦେଖିଲାନି ପୁତୁରା । ମାତ୍ର ୫୦୦ ଟଙ୍କା ପାଇଁ ନେଇଗଲା ଖୁଡିର ଜୀବନ । କୁରାଢ଼ିରେ ହାଣି ଖୁଡିକୁ ମାରିଲା ପୁତୁରା । ତେବେ ଏଭଳି ଦୁଃଖଦ ଘଟଣା ଘଟିଛି କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ଡୁମୁରିଆଁ ଗାଁରେ । ପୋଲିସ ଖବର ପାଇବା ପରେ ଗାଁରେ ପହଁଞ୍ଚି ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ଅଭିଯୁକ୍ତ ପୁତୁରାକୁ ପୋଲିସ ଗିରଫ କରିଛି । ମୃତ ମହିଳା ହେଲେ ରୁବେଇ ଦାସ । ଅଭିଯୁକ୍ତ ପୁତୁରା ହେଲେ ସାଧୁ ଦାସ ।
ପୋଲିସ ରିପୋର୍ଟ ମୁତାବକ ଗତକାଲି ରାତିରେ ସାଧୁଙ୍କ ୫୦୦ ଟଙ୍କା କେଉଁଠି ରଖିଥିଲେ । ଘରେ ବହୁତ ଖୋଜାଖୋଜା କରିବା ପରେ ମଧ୍ୟ ଟଙ୍କା ମିଳିନଥିଲା । ପ୍ରଥମେ ସମସ୍ତଙ୍କୁ ଘରେ ପଚରା ପଚରି କରିଥିଲେ । ତେବେ ପରେ ଖୁଡିଙ୍କ ଉପରେ ସନ୍ଦେହ କରି ତାଙ୍କ ସହ ଝଗଡା କରିଥିଲେ । ଝଗଡା ଏତେ ଆଗକୁ ବଢ଼ିଯାଇଥିଲା ଯେ ରାଗକୁ ନିୟନ୍ତ୍ରଣ କରିପାରିନଥିଲା ସାଧୁ । ଶେଷରେ ଘର କଣରେ ଥୁଆ ହୋଇଥିବା କୁରାଢ଼ୀରେ ରୁବେଇଙ୍କୁ ହାଣି ପକାଇଥିଲା । ସାଧୁ ଏତେ ଜୋରରେ ଚୋଟ ପକାଇଥିଲା କି ଘଟଣାସ୍ଥଳରେ ହିଁ ରୁବେଇଙ୍କ ମୃତ୍ୟୁ ହୋଇଥିଲା । ପରେ ଗାଁଲୋକ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଗାଁରେ ପହଁଞ୍ଚି ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଥିଲା । ଏବଂ ଅଭିଯୁକ୍ତକୁ ଗିରଫ କରିଛି ।
