ନୟାଗଡ (ଏଟିଆର ବ୍ୟୁରୋ); ସମ୍ପର୍କ ଦେଖିଲାନି ଭାଇ । ବଡ ଭାଇ ଶୋଇଥିବା ବେଳେ ଅତି ନିର୍ଦ୍ଦୟ ଭାବରେ କଟୁରୀରେ ହାଣିଦେଲା ସାନଭାଇ । ନୟାଗଡ ଜିଲ୍ଲା ଶରଣକୁଳ ଥାନା ଅନ୍ତର୍ଗତ ଚଢ଼େୟାପଲ୍ଲୀ ଗାଁରେ ଘଟିଛି ଅଘଟଣ । ମୃତକ ଜଣକ ହେଲେ କୁବେର ସାହୁ । ଭାଇକୁ ହାଣିବା ପରେ କୁବେରଙ୍କ ସାନଭାଇ ଧନେଶ୍ୱର ଶରଣକୁଳ ଥାନାରେ ଆତ୍ମସମର୍ପଣ କରିଥିଲା । ପୋଲିସ ଧନେଶ୍ୱରକୁ ଅଟକ ରଖି ପଚରା ଉଚରା କରୁଛି ।
ମଙ୍ଗଳବାର ବିଳମ୍ବିତ ରାତିରେ ଛାତ ଉପରେ ଶୋଇଥିବା କୁବେରଙ୍କୁ ଆକ୍ରମଣ କରିଥିଲା ଧନେଶ୍ୱର । ଘରେ ଥିବା ଏକ କଟୁରୀରେ ସିଧା ବେକକୁ ହାଣିଦେଇଥିଲା । ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଥାନାରେ ଆତ୍ମସମର୍ପଣ କରିବା ପରେ କୁବେରଙ୍କ ସ୍ତ୍ରୀ ଫୋନି ଥାନାରେ ଏତଲା ଦେଇଥିଲେ । ଏହି ଏତଲା ଆଧାରରେ ପୋଲିସ ତଦନ୍ତ ଆରମ୍ଭ କରିଛି । ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ପୋଲିସ ।
ଉଭୟଙ୍କ ମଧ୍ୟରେ ସବୁବେଳେ କଜିଆ ଲାଗି ରହୁଥିବା କହିଛନ୍ତି ପଡୋଶୀ । ଜମି ବାଡି ଘଟଣାକୁ ନେଇ ସବୁବେଳେ ଦୁଇ ଭାଇଙ୍କ ମଧ୍ୟରେ ଝଗଡା ଲାଗୁଥିଲା । ପାରିବାରିକ କଳହ ଶେଷରେ ଉଗ୍ରରୂପ ନେଇଥିଲା । ତେବେ ଫୋନି ଅଭିଯୋଗ କରିଛନ୍ତି କି ଶାଶୂ ଶ୍ୱଶୁର ଏବଂ ଦିଅର ସବୁବେଳେ ତାଙ୍କୁ ହଇରାଣ କରୁଥିଲେ । ଏମିତିକି ମାଡ ଗାଳି ମଧ୍ୟ ଦେବାକୁ ପଛାଉନଥିଲେ । ଶାଶୁ ଶ୍ୱଶୁର ସବୁବେଳେ ସାନ ପୁଅକୁ ସମର୍ଥନ ଦେଉଥିଲେ । ଏବଂ ବଡପୁଅକୁ ସାବତ ପୁଅ ଭଳି ଦେଖୁଥିଲେ ।
