ଅନୁଗୁଳ (ଏଟିଆର ବ୍ୟୁରୋ); ଓଭର ବ୍ରିଜ୍ ତଳକୁ ଖସି ପଡିଲା ବସ୍ । ୪୦ରୁ ଉର୍ଦ୍ଧ ଯାତ୍ରୀ ବସରେ ଯାତ୍ରା କରୁଥିଲେ । ୮ଜଣ ଯାତ୍ରୀଙ୍କ ଅବସ୍ଥା ଗରୁତର ରହିଛି । ଅନୁଗୁଳ ଜିଲ୍ଲା ବଅଁରପାଳ ଅଞ୍ଚଳରେ ଘଟିଛି ଏଭଳି ମର୍ମନ୍ତୁଦ ସଡକ ଦୁର୍ଘଟଣା । ସ୍ଥାନୀୟ ଲୋକ ଏବଂ ଦମକଳ ବାହିନୀର କର୍ମଚାରୀ ଯାତ୍ରୀଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛନ୍ତି । ଗୁରୁତର ଆହତଙ୍କୁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ , ଆଜି ଭୋର ୪ଟା ସମୟରେ ‘ଦିଲଖୁସ’ ନାମକ ଏକ ଘରୋଇ ବସ୍ ଝାରସୁଗୁଡାରୁ ଭୁବନେଶ୍ୱର ଅଭିମୁଖେ ଯାତ୍ରା କରୁଥିଲେ । ବଅଁରପାଳ ଓଭର ବ୍ରିଜ୍ ନିକଟରେ ବସଟି ଭାରସାମ୍ୟ ହରାଇ ତଳକୁ ଖସି ପଡିଥିଲା । ବସରେ ଥିବା ୪୦ ଜଣ ଯାତ୍ରୀ ଅଳ୍ପ ବହୁତ ଆହତ ହୋଇଛନ୍ତି । ତେବେ ସେମାନଙ୍କ ମଧ୍ୟରୁ ୮ଜଣଙ୍କ ଅବସ୍ଥା ଗୁରୁତର ରହିଛି ।
ପ୍ରଥମେ ସ୍ଥାନୀୟ ଲୋକ ଯାଇ ଯାତ୍ରୀଙ୍କୁ ଉଦ୍ଧାର କରିବାରେ ସହଯୋଗ କରିଥିଲେ । ଏହାପରେ ଅଗ୍ନିଶମ କର୍ମଚାରୀ ଖବର ପାଇବା ପରେ ଘଟଣାସ୍ଥଳରେ ପହଁଞ୍ଚି ଯାତ୍ରୀଙ୍କୁ ଉଦ୍ଧାର କରିଥିଲେ । ପୋଲିସ ଖବର ପାଇବା ପରେ ଘଟଣାର ତଦନ୍ତ ଆରମ୍ଭ କରିଛି । ତେବେ ବାରମ୍ବାର ସଚେତନ ପରେ ମଧ୍ୟ ପ୍ରତ୍ୟେକ ଦିନ ଏଭଳି ଦୁର୍ଘଟଣା ଘଟୁଛି ।
