ଲଣ୍ଡନ (ଏଟିଆର ବ୍ୟୁରୋ); ସୁପର ସଣ୍ଡେରେ ହାଇଭୋଲଟେଜ ମ୍ୟାଚ । ଆୟୋଜନ ଇଂଲଣ୍ଡକୁ ଭେଟିବ ଭାରତ । ଆଜିର ମ୍ୟାଚ ଉପରେ ରହିଛି ସମସ୍ତଙ୍କ ନଜର । ଭାରତ ନୂଆ ଜର୍ସିରେ ଆଜି ମୈଦାନକୁ ଓହ୍ଲାଇବ । ଆଜି ପର୍ଯ୍ୟନ୍ତ ଯାହା କେବେ ଦେଖିବାକୁ ମିଳିନଥିଲା ସେହିଭଳି କିଛି ଦେଖିବାକୁ ମିଳିବ ଆଜିର ମ୍ୟାଚରେ । ଭାରତର ପାରମ୍ପରିକ ପ୍ରତିଦ୍ୱନ୍ଦୀ ପାକିସ୍ତାନ ସବୁବେଳେ ଚାହେଁ କି ହିନ୍ଦୁସ୍ତାନ ହାରୁ । କିନ୍ତୁ ଆଜି ଇଂଲଣ୍ଡ ବିପକ୍ଷ ମ୍ୟାଚରେ ଭାରତ ଜିତୁ ବୋଲି ଆଲ୍ଲାଙ୍କୁ ପ୍ରାର୍ଥନା କରିବେ ପାକିସ୍ତାନୀ କ୍ରିକେଟପ୍ରେମୀ ।
ଭାରତ ଖେଳ ଉପରେ ପାକିସ୍ତାନର ଭାଗ୍ୟ ନିର୍ଦ୍ଧାରଣ କରୁଛି । ଆଜି ଯଦି ଇଂଲଣ୍ଡ ଜିତିଯାଏ ତେବେ ପାକିସ୍ତାନଠାରୁ ଉପରକୁ ଉଠିବ ଦଳ । ଶେଷ ମ୍ୟାଚରେ ଇଂଲଣ୍ଡ ନ୍ୟୁଜିଲାଣ୍ଡକୁ ଭେଟିବ । ତେବେ ସେ ଯଦି ଜିତିଯାଏ ତେବେ ଦଳ ସେମିଫାଇନାଲରେ ପହଁଞ୍ଚିଯିବ । ଏଣୁ ଶେଷ ମ୍ୟାଚ ପୂର୍ବରୁ ଯଦି ଇଂଲଣ୍ଡ ଭାରତଠାରୁ ହାରିଯାଏ ତେବେ ପାକିସ୍ତାନର ପାଇଁ ଫାଇଦା ରହିବ । ଏଣୁ ପାକିସ୍ତାନ କ୍ରିକେଟ ପ୍ରେମୀ ପ୍ରଥମଥର ଲାଗି ଭାରତକୁ ସମର୍ଥନ କରିବେ ।
ଘରୋଇ ମାଟିରେ ଇଂଲଣ୍ଡ ଖେଳୁଥିବାରୁ ଦଳ ଭଲ ପ୍ରଦର୍ଶନ କରିବ ଏବଂ ସେମି ନିକଟତର ହେବା ପାଇଁ ଭଲ ଖେଳିବ ବୋଲି କ୍ରିକେଟ ବିଶେଷଜ୍ଞମାନେ ମତ ଦେଇଛନ୍ତି । ତେବେ ଭାରତ ଏବେ ସୁଦ୍ଧା ଚଳିତ ବିଶ୍ୱକପରେ ଗୋଟିଏ ବି ମ୍ୟାଚ ହାରିନାହିଁ । ଯଦି ଆଜି ଭାରତ ଜିତେ ତେବେ ସେମିଫାଇନାଲରେ ପହଁଞ୍ଚି ଯିବ । ଆଜିର ମ୍ୟାଚରେ ପ୍ରାୟ ସମସ୍ତଙ୍କ ନଜର । ଭାରତ ଆଜି ପୂର୍ବ ମ୍ୟାଚରେ ଖେଳୁଥିବା ଖେଳାଳିଙ୍କୁ ଖେଳାଇବ ବୋଲି ଶୁଣିବାକୁ ମିଳିଛି ।
