ବୌଦ୍ଧ (ଏଟିଆର ବ୍ୟୁରୋ); ବାପାଘରକୁ ବୁଲିବା ପାଇଁ ଆସିଥିଲେ ସ୍ୱାମୀ ସ୍ତ୍ରୀ । ଘରକୁ ଫେରୁଥିବା ବେଳେ ଧକ୍କା ଦେଇଥିଲା ଟ୍ରକ । ଘଟଣାସ୍ଥଳରେ ମହିଳାଙ୍କ ଜୀବନ ଚାଲିଯାଇଥିବା ବେଳେ ତାଙ୍କ ସ୍ୱାମୀ ଗୁରୁତର ଭାବେ ଆହତ ହୋଇଛନ୍ତି । ବୌଦ୍ଧ ଜିଲ୍ଲା ୫୭ ନମ୍ବର ଜାତୀୟ ରାଜପଥରେ ଘଟିଛି ଏଭଳି ମର୍ମନ୍ତୁଦ ସଡକ ଦୁର୍ଘଟଣା । ମୃତ ମହିଳା ଜଣକ ଗର୍ଭବତୀ ଥିବା ଜଣା ପଡିଛି । ମୃତକ ହେଲେ ଜ୍ୟୋସ୍ନା ପ୍ରଧାନ । ତାଙ୍କ ସ୍ୱାମୀ ହେଲେ ସନ୍ତୋଷ ପ୍ରଧାନ । ପୋଲିସ ଖବର ପାଇବା ପରେ ଟ୍ରକକୁ ଜବତ ରଖିଛି ।
ମଙ୍ଗଳବାର ଜ୍ୟୋସ୍ନାଙ୍କ ବାପାଘର ଦଶପଲ୍ଲାକୁ ସ୍ୱାମୀ ସ୍ତ୍ରୀ ଆସିଥିଲେ । ଘରକୁ ଫେରୁଥିବା ବେଳେ ବଦଳାସାହି-ଚକାପାଦ ରାସ୍ତାରେ ତାଙ୍କର ଦୁର୍ଘଟଣା ହୋଇଥିଲା । ଟ୍ରକଟି ଏତେ ଜୋରରେ ମାଡ ହୋଇଥିଲା କି ଘଟଣାସ୍ଥଳରେ ହିଁ ଜ୍ୟୋସ୍ନାଙ୍କ ମୃତ୍ୟୁ ହୋଇଥିଲା । ସ୍ଥାନୀୟ ଲୋକ ସନ୍ତୋଷଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ତାଙ୍କୁ ପୁରୁଣା କଟକ ମେଡିକାଲରେ ଭର୍ତ୍ତି କରାଯାଇଛି । ଏହି ଦୁଘଟଣା ଖବର ପ୍ରଚାର ହେବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
