ବାଲୁଗାଁ(ଏଟିଆର ବ୍ୟୁରୋ): ଗତ କାଲି ସଂନ୍ଧ୍ୟାରେ ବାଲୁଗାଁ ନାଭାଲ ରୋଡ ଦେଇ ଆସୁଥିବା ଜଣେ ମହିଳାଙ୍କ ଠାରୁ କଳା ପଲସରରେ ଆସି ଦୁର୍ବୃତ୍ତ ମାନେ ଭ୍ୟାନିଟି ଝାମ୍ପି ନେଲା ବେଳେ ମହିଳା ଜଣଙ୍କ ବାଇକରୁ ଖସି ପଡି ମୃତୁବରଣ କରିଛନ୍ତି । ସୂଚନା ଅନୁସାରେ ଗଞ୍ଜାମ ଜିଲ୍ଳା ଖଲିକୋଟ ଥାନା ଚିକିଲି ଗ୍ରାମର ମୋଚିରାମ ମହାନ୍ତିଙ୍କ ପତ୍ନୀ ମଞ୍ଜୁବାଳା ମହାନ୍ତି ନିଜ ସର୍ମ୍ପକୀୟ କୈଳାସ ମଲ୍ଲିକଙ୍କ ବାଇକରେ ବାଣପୁର ଅଞ୍ଚଳରେ ଥିବା ନିଜ ଭଉଣୀ ଘରକୁ ଆସୁଥିଲେ ।
ବାଲୁଗାଁ ନାଭାଲ ଛକ ନିକଟରେ ଅଚାନକ କଳା ପଲସରେ ଦୁଇ ଜଣ ଦୁର୍ବୃତ୍ତ ଆସି ମଞ୍ଜୁବାଳାଙ୍କ ଭ୍ୟାନିଟି ବ୍ୟାଗକୁ ଝାମ୍ପି ନେଇଥିଲେ । ଏହି ସମୟରେ କୈଳାସ ତାଙ୍କ ବାଇକର ଭାରସ୍ୟାମ ହରାଇ ଥିଲେ । ଉଭୟ କୈଲାସ ଓ ମଞ୍ଜୁବାଳା ବାଇକରୁ ଛିଟିକି ପଡିବାରୁ ମଞ୍ଜୁବାଳାଙ୍କ ମୁଣ୍ଡରେ ଶକ୍ତ ଆଘାତ ଲାଗିଥିଲା । ସ୍ଥାନୀୟ ଲୋକେ ମଞ୍ଜୁବାଳା ଓ କୈଲାସଙ୍କୁ ଉଦ୍ଧାର କରି ବାଣପୁର ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଡାକ୍ତର ମଞ୍ଜୁବାଳାଙ୍କୁ ମୃତ ଘୋଷଣା କରିଥିଲେ ।
ବାଲୁଗାଁ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ୧୬ ନମ୍ବର ଜାତୀୟ ରାଜପଥର ନାଭାଲ ଛକ ନିକଟରେ ଏହି ଭଳି ଘଟଣା ବାରମ୍ବାର ଘଟୁଥିଲେ ମଧ୍ୟ ପୋଲିସ ପ୍ରଶାସନର ନିଘା ନାହିଁ । ପୁଣି ଥରେ କଳା ପଲସରରେ ଲୁଟେରା ମାତିଥିବାରୁ ସ୍ଥାନୀୟ ଲୋକ ଆତଙ୍କିତ ହୋଇ ପଡିଛନ୍ତି ।
