ଚାନ୍ଦା ନେଉଛି ଚନ୍ଦ୍ରଶେଖରପୁର ଥାନା ପୁଲିସ, ଲୋକଙ୍କ ଉପରେ ଦାଉ

ଭୁବନେଶ୍ୱର,(ଏଟିଆର ବ୍ୟୁରୋ): ମଦ ମାଫିଆ ସହ ହାତ ମିଳାଇଛି ପୁଲିସ । ମୋଟା ଅଙ୍କର ଟଙ୍କା ନେଇ ତାଙ୍କୁ ଭରପୁର ସହଯୋଗ କରୁଛି । ଅଭିଯୋଗ କଲେ ଓଲଟି ପୁଲିସ ନିରିହ ଲୋକଙ୍କୁ ନାଲି ଆଖି ଦେଖାଉଛି । କେତେବେଳେ କାହାର ଅଭିଯୋଗ ପତ୍ରକୁ ପୁଲିସ ଚିରିଦେଉଛି ତ’ ଆଉ କେତେବେଳେ ପୁଲିସିଆ ଠାଣିରେ ନିରିହ ଲୋକଙ୍କୁ ଥାନାରେ ବସାଇ ଦେଉଛି । ସିଧା କହିବାକୁ ଗଲେ ମଦ ମାଫିଆଙ୍କୁ ଘଁଟ ଘୋଡାଇ ଲୋକଙ୍କ ଉପରେ ଦାଉ ସାଜୁଛି ପୁଲିସ । ଖାସ ଏଥିପାଇଁ ଭୟରେ ୧୫ଟି ପରିବାର ଏବେ ଏରିଆ ଛାଡି ଏଣେତେଣେ ବୁଲୁଛନ୍ତି । ଏମିତି ସାଙ୍ଘାତିକ ଅଭିଯୋଗ ଆସିଛି ଚନ୍ଦ୍ରଶେଖରପୁର ଥାନା ବିରୋଧରେ । ଲୋକେ ନ୍ୟାୟ ପାଇଁ ଏବେ ମାନବାଧିକାର କମିଶନଙ୍କଠୁ ନେଇ ଲୋକପାଳଙ୍କ ଦ୍ୱାରସ୍ଥ ହୋଇଛନ୍ତି । ଚନ୍ଦ୍ରଶେଖରପୁର ଥାନା ପୁଲିସ ଦିନକୁ ଦିନ ଲୋକଙ୍କୁ ସୁରକ୍ଷା ଦେବା ପରିବର୍ତେ ଅଭିଯୁକ୍ତଙ୍କୁ ଘଁଟ ଘୋଡାଉଥିବା ସେମାନେ ଅଭିଯୋଗରେ ଦର୍ଶାଇଛନ୍ତି ।
ଲକ୍ଷ୍ମୀଧର ମଲ୍ଲିକ ନାମକ ଜଣେ ବ୍ୟକ୍ତି ମା ମଙ୍ଗଳା ବସ୍ତିରେ ଚୋରା ମଦ କାରବାର କରୁଛି । ଯାହପାଇଁ ସବୁବେଳେ ଅପ୍ରିତିକର ପରିସ୍ଥିତି ଉପୁଜିଛି । ବସ୍ତିରେ ରହୁଥିବା ଝିଅ ବୋହୂଙ୍କ ଉପରେ ଏହାର ପ୍ରଭାବ ପଡୁଛି । ଏନେଇ କେତେକ ମହିଳା ଓ ବୟସ୍କ ବ୍ୟକ୍ତି ବିରୋଧ କରିଥିଲେ । ମାମଲା ଥାନାକୁ ମଧ୍ୟ ଯାଇଥିଲା । କିନ୍ତୁ ଥାନା ଅଧିକାରୀ ଘଟଣାକୁ ଗୁରୁତ୍ୱ ନଦେଇ ଓଲଟି ଅଭିଯୋଗକାରୀଙ୍କୁ ହତାସ କରିବା ସହ ନାଲି ଆଖି ଦେଖାଇ ତଡିଦେଇଥିବା ଅଭିଯୋଗ ହୋଇଛି । କେବଳ ଏତିକି ନୁହେଁ ଚୋରା ମଦକାରବାରରେ ପୁଲିସ ଲକ୍ଷ୍ମୀଧରଙ୍କଠୁ ମାସିକିଆ ଚାନ୍ଦା ନେଇ ଏପରି କରୁଥିବା ଲୋକେ ଜଣାଇଛନ୍ତି ।

ପୁଲିସର ନିରବତାକୁ ନେଇ ଏବେ ଲକ୍ଷ୍ମୀଧର ପୂରା ବସ୍ତିବାସିନ୍ଦାଙ୍କ ଉପରେ ହାକିମାତି କରୁଛି । ଭୟରେ ମହିଳାମାନେ ଏବେ ବସ୍ତି ଛାଡି ନ୍ୟାୟ ଲାଗି ଏବେ ଉପରିସ୍ଥ ଅଧିକାରୀଙ୍କ ପାଖରେ ଫେରାଦ ହୋଇଛନ୍ତି । ସୂଚନାଯୋଗ୍ୟ, କିଛିଦିନ ହେବ ଚନ୍ଦ୍ରଶେଖରପୁର ଥାନା ଉପରେ ବହୁ ଅଭିଯୋଗ ଉଠୁଛି । କଥା ସତ ହେଉ ଅବା ମିଛ, ବିଭାଗୀୟ ଅଧିକାରୀ ଏହାକୁ ଗୁରୁତର ସହ ନେଇ ଯାଁଚ କରିବା ନିହାତି ଦରକାର ବୋଲି ବୁଦ୍ଧିଜୀବୀ ମତ ରଖିଛନ୍ତି । ଚନ୍ଦ୍ରଶେଖରପୁର ଥାନା ପୁଲିସର ମନମାନିକୁ ନେଇ ନିକଟରେ ତୁମୁଳକାଣ୍ଡ ଘଟିଥିଲା ।

ଯାହାପାଇଁ ରାସ୍ତା ଅବରୋଧଠୁ ନେଇ ବଡବଡ଼ ଅଧିକାରୀକୁ ନାକେଦମ ହେବାକୁ ପଡିଥିଲା । ପୁଲିସ ଲୋକଙ୍କ ନିକଟତର ହେବାକୁ ଖୋଦ ଡିଜିପି ଆହ୍ୱାନ ଦେଉଥିବା ବେଳେ ଏପଟେ ଲୋକଙ୍କୁ ଦୂରଦୂର ମାରମାର ପୁଲିସ କରିବା ଘଟଣା ପ୍ରମାଣ କରୁଛି ବିଲକୁଲ ବେଫିକର ଚନ୍ଦ୍ରଶେଖରପୁର ଥାନା ପୁଲିସ । ତୁରନ୍ତ ଏହା ଉପରେ ପଦକ୍ଷେପ ନନିଆଗଲେ ଆଗକୁ ଏହାମଧ୍ୟ ଉଗ୍ରରୂପ ଧାରଣ ନକରିବ ତାହା କିଏ କହିବ ।