(ରିପୋର୍ଟ: ସୀତାଞ୍ଜଳୀ ଜେନା )
ଭୁବନେଶ୍ୱର: ଓଲିଉଡ ଫିଲ୍ମ ‘ପ୍ରେମ ଅଢେଇ ଅକ୍ଷର’ରେ ଡେବ୍ୟୁ କରିଥିବା ଅଭିନେତ୍ରୀ ରିୟା ଦେ’ ବିଗତ କିଛି ଦିନ ହେବ ଇଣ୍ଡଷ୍ଟ୍ରିରୁ ଦୂରେଇ ରହିଥିଲେ । ସିମ୍ପଲ ଲୁକ ଏବଂ ଚମତ୍କାର ଅଭିନୟ ପାଇଁ ଦର୍ଶକ ତାଙ୍କୁ ଖୁବ୍ ପସନ୍ଦ କରିଥାନ୍ତି । କିନ୍ତୁ ବର୍ତ୍ତମାନ ସେ ଏକ ନୂତନ ଫିଲ୍ମରେ ଜବରଦସ୍ତ ଏଣ୍ଟ୍ରି କରିବାକୁ ଯାଉଛନ୍ତି । ପ୍ରେମ କାହାଣୀ ଉପରେ ଆଧାରିତ ଫିଲ୍ମ ‘ଦିୱାନି ହେଲି ତୋ ପାଇଁ’ରେ ରିୟାଙ୍କୁ ଦେଖିବାକୁ ମିଳିବ ।
ପୁନମ ବ୍ୟାନରର ଶ୍ରୀତମ ଦାସଙ୍କ ନିର୍ଦ୍ଦେଶିତ ଏହି ଫିଲ୍ମରେ ରିୟାଙ୍କ ପ୍ରେମରେ ପାଗଳ ହୋଇଛନ୍ତି ଜଣେ ସଂଭ୍ରାନ୍ତ ଶ୍ରେଣୀର ପୁଅ ଯାହାର ନାମ ହେଲା ରାଜ୍ । ଏହିଭଳି ଫିଲ୍ମରେ ଅନେକ ଟ୍ଵିଷ୍ଟ ଅଛି । ଯାହା ଫିଲ୍ମଟି ରିଲିଜ ହେବା ପରେ ଜଣାପଡିବ । ରିୟାଙ୍କ ସମେତ ଏହି ଫିଲ୍ମରେ ମୁନ୍ନା, ସିଦ୍ଧାନ୍ତ ମହାପାତ୍ର, ଶ୍ରୀତମ ଦାସ, ଉଶାସୀ ମିଶ୍ର ଏବଂ ପପୁ ପମପମ ନଜର ଆସିବେ । ଫିଲ୍ମଟି ୧୩ ଏପ୍ରିଲ ୨୦୧୮ରେ ପରଦାରେ ରିଲିଜ୍ ହେବ ।
ଏହାବ୍ୟତୀତ ରିୟା ଓଲିଉଡରେ ଫିଲ୍ମ ‘ପ୍ରେମ ଅଢେଇ ଅକ୍ଷର’, ‘କ୍ରିମିନାଲ’, ‘ଏମିତ ବି ପ୍ରେମ ହୁଏ’, ଏବଂ ‘ଇଡିଅଟ’ରେ ନିଜ ଅଭିନୟର ଜଲୱା ଦେଖାଇ ସାରିଛନ୍ତି । ରିୟାଙ୍କ କମବ୍ୟାକ ଏବେ ଦର୍ଶକଙ୍କ ମନ ମୋହି ପାରିବ ବୋଲି ଚାରିଆଡେ ଚର୍ଚ୍ଚା ହେଉଛି ।
