ସମ୍ବଲପୁର (ଏଟିଆର ବ୍ୟୁରୋ): ଆଗକୁ ଆସୁଛି ସମ୍ବଲପୁରର ଗଣପର୍ବ ନୂଆଁଖାଇ । ପ୍ରତିବର୍ଷଭଳି ଏବର୍ଷ ଏହି ପର୍ବକୁ ପାଳନ କରିବା ପାଇଁ ଲୋକଙ୍କ ଉତ୍ସାହିତ ଅଛନ୍ତି । ହେଲେ ଚଳିତବର୍ଷ ମହାମାରୀ କରୋନା ଯେପରି ସମସ୍ତଙ୍କ ନିଦ ହଜାଇ ଦେଇଛି ସେଥିପାଇଁ ପର୍ବ ପାଳନ ସମୟରେ କିଛିଟା କଟକଣା ଦେଖିବାକୁ ମିଳିବ । ତେବେ ଆସନ୍ତା ୨୩ତାରିଖରେ ପାଳନ ହେବାକୁ ଥିବା ନୂଆଁଖାଇ ପାଇଁ ସମସ୍ତ ପ୍ରକାର ପ୍ରସ୍ତୁତି ଆରମ୍ଭ ହୋଇ ଯାଇଥିବା ବେଳେ ଲଗ୍ନ ମଧ୍ୟ ନିରୂପଣ କରାଯାଇଛି ।
ଝାଡୁଆପଡା ସ୍ଥିତ ବ୍ରହ୍ମପୁରା ମନ୍ଦିର ପ୍ରାଙ୍ଗଣରେ ବ୍ରହ୍ମମଣ୍ଡପ ପଣ୍ଡିତ ମହାସଭାର ବୈଠକରେ ଲଗ୍ନ ଧାର୍ଯ୍ୟ ହୋଇଛି । ଆସନ୍ତା ୨୩ତାରିଖ ଭାଦ୍ରବ ଶୁକ୍ଳପକ୍ଷ ପଞ୍ଚମୀର ଦିନ ପୂର୍ବାହ୍ନ ୯ଟା ୩୫ ମିନିଟରୁ ୯ଟା ୫୦ ମଧ୍ୟରେ ପ୍ରଶସ୍ତ ତୁଳା ଲଗ୍ନରେ ଦେବୀଙ୍କୁ ନବାନ୍ନ ଅର୍ପଣ ଲାଗି ଶୁଭ ଲଗ୍ନ ଆଯୋଜିତ ପଣ୍ଡିତ ସଭାରେ ଧାର୍ଯ୍ୟ ହୋଇଛି । ମନ୍ଦିର ପ୍ରାଙ୍ଗଣରେ ପାରମ୍ପରିକ ପୂଜା ପରେ ପାଞ୍ଜି ଦେଖି ନୂଆଁଖାଇ ଲଗ୍ନ ଘୋଷଣା କରାଯାଇଛି । ଏହି ସମୟ ମଧ୍ୟରେ ମା’ଙ୍କ ନିକଟରେ ନବାନ୍ନ ଲାଗି କରାଯିବ। ଏହାପରେ ପଶ୍ଚିମ ଓଡ଼ିଶାର ପୁରପଲ୍ଲୀରେ ଲୋକେ ନିଜ ନିଜ ଘରର ଇଷ୍ଟଦେବୀଙ୍କ ଠାରେ ନବାନ୍ନ ଅର୍ପଣ କରି ନିଜେ ଭକ୍ଷଣ କରିବେ।
