ସମ୍ବଲପୁର,(ଏଟିଆର ବ୍ୟୁରୋ): ସମ୍ବଲପୁର ପୁଲିସକୁ ବଡ଼ ସଫଳତା । ଏକ ଚୋରା ବନ୍ଧୁକ ଚାଲାଣର ପର୍ଦ୍ଦାଫାସ ହୋଇଛି । ଘଟଣାର ମାଷ୍ଟର ମାଇଣ୍ଡକୁ ଗିରଫ କରାଯିବ ସହ ତା’ ପାଖରୁ ଜବତ ହୋଇଛି ୫ଟି ବନ୍ଧୁକ ସହ ୧୨ଟି ଗୁଳି ଓ ୨ଟି ଖୋକା । ଏହି ଘଟଣାରେ ପୁଲିସ ଜାଲରେ ପଡିଥିଲା ଅଭିଯୁକ୍ତ ଜଣକ ହେଉଛି ମହମ୍ମଦ ଜାହିନ ଖାନ । ତା’ର ଜଳେଇପଡା ଘରେ ପୁଲିସ ଅତର୍କିତ ଚଢ଼ାଉ କରି ଏସବୁର ଗୁମର ଫିଟାଇଛି ।
ମହମ୍ମଦ ସହରରେ ଦୀର୍ଘ ଦିନ ହେବ ଚୋରା ବନ୍ଧୁକ କାରବାର ଚଳାଇ ଆସୁଥିଲା। ତାଙ୍କ ନାଁରେ ଜିଲ୍ଲାର ବିଭିନ୍ନ ଥାନାରେ ଏକାଧିକ ମାମଲା ଥିବା ପୋଲିସ ପକ୍ଷରୁ କୁହାଯାଇଛି। କେଉଁ ସ୍ଥାନରୁ ମହମ୍ମଦ ବନ୍ଧୁକ ଆଣୁଥିଲା ଓ କେଉଁମାନଙ୍କୁ ଚୋରାରେ ବିକ୍ରୀ କରୁଥିଲା, ତା’ ଉପରେ ଖୋଳତାଡ଼ କରୁଛି ପୋଲିସ୍। ଏହି ଘଟଣାରେ ଆହୁରି ଗିରଫଦାରୀର ସମ୍ଭାବନା ରହିଛି ବୋଲି ପୋଲିସ୍ କହିଛି।
