ଭୁବନେଶ୍ୱର (ଏଟିଆର ବ୍ୟୁରୋ): ନିଟ୍ ପରୀକ୍ଷାରେ ଶତପ୍ରତିଶତ ମାର୍କ ରଖି ଇତିହାସ ରଚିଥିବା ସୋଏବ ଅଫତାବଙ୍କୁ ଅଭିନନ୍ଦନ ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସୋଏବଙ୍କ ଉଜ୍ଜଳ ଭବିଷ୍ୟତର କାମନା କରିବା ସହ ଆଗକୁ ଜୀବନରେ ଏଭଳି ସଫଳ ହୁଏ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଗତକାଲି ସନ୍ଧ୍ୟାରେ ନିଟ୍ ପରୀକ୍ଷା ଫଳ ପ୍ରକାଶ ପାଇଥିଲା । ଏହି ପରୀକ୍ଷା ରେ ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ଅଧିକାର କରିଛନ୍ତି ଜଣେ ଓଡିଆ ପୁଅ । ରାଉରକେଲାର ସୋଏବ ଅଫତାବ୍ ୭୨୦ ରୁ ୭୨୦ ମାର୍କ ରଖି ଗୌରବ ଅର୍ଜ୍ଜନ କରିଛନ୍ତି । ପୂର୍ବରୁ ନିଟ୍ ପରୀକ୍ଷାରେ କେହି ପ୍ରଥମ ସ୍ଥାନ ଅଧିକାର କରିନଥିଲେ ।
ସୋଏବଙ୍କ ସଫଳତା ପାଇଁ ତାଙ୍କ ପରିବାର ଗର୍ବ ଅନୁଭବ କରୁଛନ୍ତି । ପରିବାରରେ ସୋଏବ ପ୍ରଥମ ସଦସ୍ୟ ଯିଏ କି ମେଡିକାଲ ପାଠ ପଢିଛନ୍ତି । ସୋଏବଙ୍କ ପିତା ମୋହମ୍ମଦ ଅବ୍ୱାସ ଜଣେ ବ୍ୟବସାୟୀ ହୋଇଥିବା ବେଳେ ମାତା ସୁଲତାନା ରିଜୟା ଜଣେ ଗୃହିଣୀ । ସୋଏବ ତାଙ୍କ ସଫଳତାର ସମ୍ପୂର୍ଣ୍ଣ ଶ୍ରେୟ ତାଙ୍କ ମାତା-ପିତାଙ୍କୁ ଦେଇଛନ୍ତି ।
